Бугун Қаршида ажойиб футбол шукуҳи ҳукм сурмоқда. Воҳалик футбол мухлислари бугун ўз севикликлари иштирокидаги тарихий ўйинга гувоҳ бўладилар. Қаерда бўлманг футболга қизиқадиган ва қизиқмайдиганлар ўртасида ҳам шу ўйин муҳокама қилинмоқда.

Мухлислар 20:30ни интизорлик билан кутишмоқда. Зеро, бўлажак ўйинда “аждарлар”нинг “Ал-Аҳли” жамоаси устидан ғалабаси ОЧЛ-2015нинг кейинги босқичига олиб чиқади ва насиб этса, мухлислар яна “Насаф” жамоаси иштирокидаги ОЧЛ ўйинларини Қаршида томоша қилишдек бахтга муяссар бўлишади.

Биз ушбу ўйинга чипталар сотилиши шу пайтгача қай даражада эканлиги билан қизиқдик. Бу ҳақда бизга “Насаф” ПФК маркетинг бўлими бошлиғи Заҳро Каримова маълумот берди.

– Чипталарнинг ҳозирги вақтгача 70% сотиб бўлинди. Мухлисларнинг ўйинга бўлган қизиқишлари биз кутганда катта эканлиги аён бўлаяпти. Чипта харид қилмаган мухлисларни тезроқ келиб чипта харид қилишларини тавсия қилган бўлардик, акс ҳолда улгура олмай қолишлари мумкин. Чунки, чипталар сотувини 16:00да тўхтатамиз. Бизнинг тахминимизча, чипталарнинг бу даражада сотилиши давом этса, кассаларимиз бу вақтдан аввалроқ ҳам ёпилиши мумкин, – дейди Заҳро Каримова.

Биз эса, сайтимиз номидан барча-барча воҳалик мухлисларини бугунги муҳим ўйинда севикли “Насаф” жамоамизни стадионда туриб, яқиндан далда бўлишларини таклиф қилиб қоламиз. Олға “Насаф”!