Қатар пойтахти Доҳа шаҳрида эркин, юнон-рум ва аёллар кураши бўйича Осиё чемпионати давом этмоқда. Кеча мусобақанинг иккинчи кунги баҳсларида яна бир гуруҳ ғолиб ва совриндорлар аниқланди. Қувонарлиси, улар орасида ўзбекистонлик курашчилар ҳам бор.

Жумладан, -70 кг вазн тоифасида гиламга чиққан Осиё ўйинлари ғолиби Бекзод Абдураҳмонов барча рақибларини мағлубиятга учратиб, Осиё чемпионига айланди. У олтин медал учун кечган мураккаб финал баҳсида тожикистонлик рақиби Зелимхон Юсуповни 6:5 ҳисобида мағлуб этди.

Таъкидлаш жоиз, Бекзод Абдураҳмонов финалга қадар хитойлик Хайвей Лингни 8:0, чорак финалда япониялик Такафуми Кожимани 10:2, ярим финалда эса ҳиндистонлик Парвин Ранани 13:8 ҳисобида таслим этган эди.

Терма жамоамизнинг яна бир етакчи полвони Рашид Қурбонов -74 кг вазн тоифасида бронза медалини қўлга киритди. Ҳамюртимиз ярим финал беллашувида эронлик Пейман Муртазо Ярахмадига 0:2 ҳисобида имкониятни бой бериб қўйди. Бронза медали учун кечган баҳсда эса қирғизистонлик Муслим Эвлоевдан 3:0 ҳисобида устун келди.

Маълумот ўрнида айтиб ўтиш жоиз, вакилимиз ярим финалга қадар аввалига хитойлик Чонгяо Жангни 6:3, чорак финалда эса ироқлик Аҳмад Муҳсин Кадимни 11:0 ҳисобида мағлубиятга учратган эди.

Хабар берганимиздек, аёллар кураши баҳсларида терма жамоамиз аъзолари илк баҳслардаёқ мағлубиятга учрашди. -48 кг вазн тоифасидаги вакиламиз Даулетбике Яхшимуратова қозоғистонлик Татьяна Бакатюкка 0:2,  -58 кг вазнда курашган Саломат Кўчимова ҳиндистонлик Гита Гитага 0:11 ҳисобида мағлуб бўлди.

Эслатиб ўтамиз, кечаги баҳсларда Руслан Плиев (-65 кг) ва Умиджон Исманов (-86 кг) бронза медалларига сазовор бўлишганди. Яна бир спортчимиз Нодиржон Сафаров (-57 кг) эса бешинчи ўринни эгаллаганди.

Демак, ҳозирча терма жамоамиз ҳисобида 1 та олтин, 3 та бронза медали бор.