Ўзбекистон ёшлар терма жамоаси футболчилари яқинлашиб келаётган жаҳон чемпионат олдидан Sports.uz интернет порталига ўз фикрларини билдириб ўтишмоқда. Жорий йилдан терма жамоага жалб қилинган Темур Толипов ҳам ўз фикрлари билан ўртоқлашди.

- Мусобақага яхши кайфиятда кетмоқдамиз. Мақсадимиз, турнирда ижобий натижалар намойиш қилиш ва халқимизни хушнуд этишдан иборатдир. Ҳозирги пайтда жамоадаги футболчиларнинг кайфиятлари аъло даражада.

- Терма жамоамиз жой олган гуруҳ хусусида фикриннгиз қандай?

- Рақибларимиз анча кучли. Германия терма жамоасини алоҳида кўрсатган бўлардим. Қолганлар ҳам яхши терма жамоалардир. Бироқ биз ҳаммасига тайёр бўлишимиз ва ғалаба учун тўп суришимизни айтиб ўтишим керак. Ишонаманки, гуруҳда яхши кўрсаткичларни қайд эта оламиз. Бунга бизнинг кучимиз етади.

- Сиз биринчи маротаба ёшлар терма жамоаси билан халқаро мусобақада иштирок этасиз. Илгари бу жамоада тўп сурамагансиз. Футболчилар билан тил топишиб кетиш жараёнида қийинчиликлар бўлмадими?

- Асло йўқ. Ҳаммаси билан яхши киришиб кета олдим. Чунки терма жамоада жалб қилинган футболчиларни аввалдан яхши танийман ва бирга тўп сурганмиз. Шу сабабли киришиб кетиш вақтида муаммо юзага келмади. Асосийси, ҳаммамиз майдонда тушуниб ҳаракат қиляпмиз. Буни жаҳон чемпионати вақтида ҳам кўрсатишга астойдил бел боғлаганмиз. Ишонаманки, ҳаммаси яхши бўлади.

- Мазмунли суҳбатингиз учун сизга раҳмат. Терма жамоага мазкур мусобақада омад ёр бўлиши тилаб қоламиз!

Иззатбек Абдуваҳобов ёзиб олди.