Москванинг “Спартак” футбол клуби раҳбарияти Туланинг “Арсенал” клуби бош мураббийи Дмитрий Аленичевни клуб бош мураббийи лавозимига асосий номзод сифатида кўриб чиқмоқда. Бу ҳақда бир-бири билан боғлиқ бўлмаган бир нечта манба хабар берди.

“Аленичев – бош мураббий лавозимига асосий номзод. Унинг номзодини клуб президенти лавозимини эгаллаши мумкин бўлган Олег Романцев қўллаб-қувватламоқда”, деб айтди манбалардан бири.

Клубнинг ҳозирги бош мураббийи Мурод Якин жорий мавсум тугагач клубни тарк этади. Бу “Спартак”нинг қониқарсиз натижалари билан боғлиқ бўлмоқда. Ҳозирда “Спартак” Россия чемпионатида 29 та ўйинда 43 очко жамғариб, 6-ўринни эгалламоқда. Клуб кейинги мавсумда ўтказиладиган екрокубок мусобақаларида иштирок этиш имкониятидан маҳрум бўлди. Якин билан амалдаги шартнома 2016 йилнинг ёзигача мўлжалланган.

Ҳозирча “Спартак” Аленичевга расмий таклиф билдирмаган. Аввалроқ “Арсенал” президенти Петр Кошельников Аленичев бу борада аниқ таклифларга эга эмаслигини айтган эди. Шу билан бирга, агар мураббийга ўз олдига Россия чемпионатида юқори вазифаларни қўювчи жамоадан таклиф билдирилса, у Аленичевни жамоада олиб қолишга уринмаслигини айтган.

Маълумот учун, Аленичев футболчи сифатида 1994-1998 ва 2004-2006 йиллар мобайнида “Спартак” сафида тўп сурган. 1997 йилда у Россиянинг энг яхши футболчиси деб тан олинган. Унинг мураббийлиги остида “Арсенал” клуби ҳаваскорлар лигасидан 2-дивизионга, ундан Миллий футбол лигасига кўтарилган ҳамда 2014 йилда эса ўз тарихида биринчи марта Россиянинг олий лигасида иштирок этиш ҳуқуқини қўлга киритган. Жорий мавсумда Аленичев жамоаси мусобақа жадвалида 29 та ўйиндан 25 очко тўплаб, охирги 16-ўринни эгаллаб турибди.