Римнинг «Рома» клуби ҳужумчиси Франческо Тотти 60 ёшгача футбол ўйнаш ниятида эканлигини маълум қилди. 38 ёшли Тотти 1989 йилдан бери «Рома» тизимида, жамоа учун илк расмий ўйинини 1993 йили ўтказган.

«Ҳар бир футболчи майдонда қанча вақт давомида ҳаракат қилишини мураббий ҳал қилади. Мен ўзимни яхши ҳис қиляпман ва Руди Гарсиянинг тўлиқ ихтиёридаман. Мени ҳамма нарса қониқтиряпти», - деди Тотти.

«Фаолиятимни 60 ёшда якунлашга ҳаракат қилиб кўраман. Футболдан кетишим ҳақида гапиришга ҳали эрта. Лекин эртами-кечми барибир шундай бўлади, буни биламан», - деди «Рома» сардори.

«Мен бирор бошқа жамоа либосида майдонга чиқишим мумкинлигини хаёлимга ҳам келтира олмаганман. Мен ҳаётимни айнан «Рома» билан боғлаганман. Мен бу клубни севаман ва бу билан фахрланаман», - дея қўшимча қилди «Рома» ҳужумчиси Франческо Тотти.