ФИФА раҳбари Жанни Инфантино Лиссабоннинг «Бенфика» ва Мадриднинг «Реал» жамоалари ўртасидаги Чемпионлар Лигаси учрашувида юз берган можарога муносабат билдирди. Ўйин давомида «қаймоқранглилар» ҳужумчиси Винисиус Жуниор ирқчилик ҳақоратларига дуч келган эди.
«Мен шокда қолдим! Бу воқеа мени жуда қаттиқ хафа қилди. Бизнинг жамиятимизда ирқчиликка ўрин йўқ. Тегишли чоралар кўрилиши учун барча ишни қилишимиз керак», — дея Халқаро футбол федерацияси матбуот хизмати раҳбарнинг сўзларини келтирмоқда.
Дастлабки ўтиш ўйини «қироллик клуби»нинг 1:0 ҳисобидаги минимал ғалабаси билан якунланди. Ягона гол иккинчи бўлим бошида Винисиус томонидан киритилди.
