Бугун Чемпионлар лигаси финалида Туриннинг “Ювентус” ва Каталониянинг “Барселона” жамоалари ўзаро майдонга тушишади. Биз ушбу жамоаларнинг ўаро ўйинлари тарихига тўхталиб ўтамиз.

Учрашувлар сони: 9 та
“Ювентус” ғалабаси: 4 та
“Барселона” ғалабаси: 3 та
Дуранг: 2 та
Тўплар нисбати: 13:12 “Барселона” фойдасига

Ўзаро ўйинлардаги кичик устунлик “Ювентус” томонида. Эътиборли жиҳати “Барса” “Юве”га қараганда 1 та кам ғалабага эришган бўлса ҳам, 1 та голни кўпроқ урган.

Ўйинга оид 10 факт
1. Жамоалар Чемпионлар лигасида 4 марта рўбаро келишган ва бир мартадан ғалаба қозонишган. Қолган 2 та ўйинда муроса кўчаси танланган.
2. Энг қизиғи ана шу 4 та ўйин ҳам Чемпионлар кубоги (лигаси)нинг ¼ финал ўйинларига тўғри келган.
3. 1985/86 йилги мавсумда “Барселона”, 2002/03 йилги мавсумда эса “Ювентус” ғалаба қозониб ярим финалга йўл олган.
4. Иккала клуб Еврокубоклар финалида илк бора ўзаро рақиб бўлишади.
5. “Барселона” “Ювентус”ни 3 ўйиндан буён мағлуб эта олмаяпти.
6. Ушбу жамоалар нейтрал майдонда фақатгина 1 марта дуч келишган. 1952 йилги “Лотин кубоги”нинг ½ финалида Парижда кечган баҳсда “Барса” 4:2 ҳисобида ғалаба қозонган.
7. “Ювентус” ҳеч қачон “Барселона”ни 2 та тўп фарқи билан мағлуб эта олмаган.
8. “Ювентус” Туринда “Барселона”ни 4 марта меҳмон қилиб бирор маротаба ҳам ютқазмаган.
9. “Барселона” ҳам “Ювентус” ҳам бу мавсумда ҳам чемпионлик, ҳам кубокни қўлга киритишди. Энди уларнинг бири “требл” қайд этиши аниқ.
10. Агар бугун “Ювентус” ютқазса Чемпионлар кубоги (лигаси) финалларида 6 марта ютқазган ягона жамоага айланади.

Фурқат Юсупов тайёрлади
Манба: www.Furkat.uz