Хабар берганимиздек, бугун Ўзбекистон миллий терма жамоаси Жаҳон чемпионати-2018 саралаш раунди иккинчи босқичи учрашувларига тайёргарликка киришди.
“Жар” стадионида ўтган машғулотларда футболчилар ёмғир ёғаётган бўлсада кўтаринки кайфиятда машқ қилишди. Дастлабки кунги машғулот якунига етгач, терма жамоамизнинг тажрибали ҳимоячиларидан бири Ислом Тўхтахўжаев ўзининг янги йиғин ва бошланаётган саралаш баҳслари тўғрисидаги фикрлари билан ўртоқлашди.
- Бугундан машғулотларга киришдик. Ҳамманинг кайфияти чоғ. Барчамиз терма жамоа ихтиёрига етиб келганимиздан хурсандмиз. Дастлабки кунги машғулотлар ажойиб тарзда ўтди. Энди олдинда турган масъулиятли ўйинларни яхши ўтказиб олишимиз зарур бўлади. Аммо ишонамиз, бу гал мундиал сари дадил қадам ташлаймиз ва орзиқиб кутилган ниятимизга етамиз. Барча футболчилар фақат Жаҳон чемпионати ҳақида ўйлашмоқда. Тўғри, ҳали ҳал қилувчи ўйинларга қадар анча вақт бор. Аммо барчасига ҳозирдан тамал тоши қўйилади. Шу сабабдан ҳам илк ўйинларданоқ яхши старт олишимиз керак. Насиб этса бу гал ниятимизга эришамиз. Бунда балким саралаш ўйинлари формати ўзгаргани ҳам қайсидир маънода қўл келар. Аммо аниқ бир фикрни ушбу босқич якунига етгач айтиш мумкин бўлади. Ҳозирча эса олдинда турган учрашувларда иложи борича яхши ўйин кўрсатишимиз ва ғалаба қозонишимиз керак, - дейди тажрибали футболчи SPORTS.uz интернет порталига.
Зоҳирбек Акрамхонов
