Олий лиганинг 13-туридан ўрин олган “Қўқон-1912” – “Нефтчи” (1:2) учрашувидан сўнг ташкил этилган матбуот анжуманида мезбон жамоа устози Рустам Абдуллаев саволларга жавоб берди, деб хабар беради “Қўқон-1912” клуби расмий сайти.
- Аввало “Нефтчи”ни бугунги ғалаба билан табриклайман. Кубокдаги баҳсни ҳам қўшиб ҳисобласак, мана бешинчи ўйинки мағлубиятга учраяпмиз. Ушбу ёқимсиз анъанага чек қўйишни жуда-жуда истагандик. Аммо ўзинглар ҳам кўрдинглар, бугун ҳисоб бўйича ютқаздик. Умуман олганда, олдинги турларда ҳам биз раиқбларимизга ўйин борасида ютқазмадик. Лекин ҳисобда аксинча бўляпти. Бугун ҳам омадимиз келмади. Рақиб жамоада иккита вазият бўлди ва гол. Гарчи мағлубиятга учраган бўлсакда, йигитларга бугунги ўйин учун раҳмат айтган бўлардим – дея гап бошлади Рустам Раҳмонович.
- Уйдаги ўйинларда ютқазаётганимиз табиийки яхши бўлмаяпти. Мухлисларимизни хурсанд қила олмаганимизга улардан яна бир бор узур сўрайман.
- Қаердадир мени ҳам айбим бор деб ўйлайман. Омадсиз ўйинлардан сўнг ўзимни айбдор хис қиляпман. Чунки натижа учун доим бош мураббий жавоб беради.
- Иккинчи бўлимда балки ўйинимизда сиз айтгандек, пасайиш бўлгандир. Бу менимча об-ҳавонинг иссиқлигидан ҳам кўра, руҳият билан боғлиқ деб ўйлайман. Бугун захирадан тушган футболчилар ўйинимизга кучайтира олмади. Улардан шу нарсани кутгандим.
- Ўйиндан олдин Андрей Баклановга айтгандим, Холматов жарима тўпларини қойилмақом тарзда тепишини. Бироқ айтиш бошқа, амалда уни бажариш бошқа масала. Лекин унга жиддий эътирозлар йўқ.
- Сардор Эминовнинг бугунги ўйинда жамоага ёрдам бера олмагани ҳам салбий таъсир ўтказди деб ҳисоблайман. Агарда у бўлганида балки бошқача ўйин бўлармиди...
- “Қўқон-1912” олий лигага 12 йилдан сўнг қайтди. Деярли бу йил янгитдан тузилган жамоа. Бирданига юқори ўринларни эгаллаб бўлмайди. Қийинчиликларни босқичма-босқич енгиб ўтишимиз керак. Ҳозир клубимиз тепасида қора булутлар юрибди, ишонаманки ёруғ кунлар ҳам келади. Бу ҳам бир синов. Насиб қилса жамоа бу йил қуйи лигага тушиб кетмайди. Келажаги бор клуб. Қўқонда кейинчалик курашчан жамоа шаклланади – дейди Абдуллаев.