“Андижон” – “Бунёдкор” (0:2) учрашувидан кейинги матбуот анжуманида биринчи бўлиб “қалдирғочлар” устози қатнашди.
- Учрашувда ғалаба қозонганимиздан хурсандман. Шогирдларим ҳаракатлари ёмон чиқмади. Лекин энг яхши ўйинларимиз ҳали олдинда. Яратилган вазиятларни голга айлантириш борасидаги камчиликларимиз секин-аста бартараф этяпмиз. “Андижон” ўз майдонида яхши ўйин кўрсатишини билардик. Ўйин охирларида битта тўп фарқи билан ютаётганимизда Абдуллаевда яхши имконият бўлди. Бахтимизга Зуҳуров маҳорат кўрсатиб, зарбани бартараф этди.
Бугунги тактикамизга Артём Филипосянни мос, деб топмадик. Чунки у кўпроқ юқори қаватда яхши ўйнайди. Шунингдек, тезкор ҳужумларга ҳам тайёр туради. “Андижон”ни ўйинидан келиб чиқиб уни заҳирада қолдирдим. Агарда рақиб кучлироқ жамоа бўлганида Артёмни асосий таркибда майдонга туширардим. Рашидов яқинда терма жамоа сафида иккита тайм ўйнагани боис уни ҳам заҳирада қолдириб, озроқ вақт қолганда ўйинга қўшдим. Ҳали мавсум давомида ўйинлар кўп. Ҳамма футболчига имконият берилади, - дейди Сергей Иванович.
