Бразилия футбол конфедерацияси Неймарнинг 4та ўйиндан иборат дисквалификацияси юзасидан апелляция бермасликка қарор қилди. Конфедерация раҳбарияти кеча оқшом 23 ёшли футболчи ва мураббийлар штаби билан суҳбатлашгандан кейин шундай қарорга келди.
«Мураббийлар штаби ва Неймар умид қиладики, КОНМЕБОЛ тартиб-интизом қўмитаси шунга ўхшаш бошқа ҳолатларда ҳам шундай қарор қабул қилади», – дейилади БФА баёнотида.
Эслатиб ўтамиз, Неймар Колумбияга қарши ўйиндан (0:1) кейин рақиб футболчиси Пабло Армерога қарата тўпни тепди ва кейинчалик вазиятга аралашган Карлос Бакка билан можарога киришгани боис қизил карточка олди. Ушбу қоидабузарлик учун Неймар 4та ўйинга дисквалификация қилинди.
