Ўзбекистон Кубоги нимчорак финал жавоб баҳси “Насаф” – “Оқ-тепа” (3:1) учрашувидан сўнг меҳмонлар устози Элдор Сакаевнинг фикрлари билан қизиқдик.

"Ўйлашимча, ўйин мухлисларга ёқди. Кескин курашларга бой учрашув бўлди. Биз имкон қадар уларга қаршилик кўрсатишга интилдик. “Насаф“дек жамоа билан ўйин биз учун катта тажриба бўлади. Бу баҳснинг бизга фойдали тарафлари кўп бўлди. “Насаф” жуда кучли жамоа. Менимча, улар биринчи даврани пешқадам сифатида якунлашади. Бугун имкон қадар ёшларга ўйнаш учун имконият бердик. Сабабики, улар бу каби юқори даражали рақибга қарши ўйнаб чиниқишсин, малакалари ошсин деб уларни майдонга туширдик. Ўйин олдидан футболчиларга: асосийси ишонч билан ўйнашларини таъкидладим. Шудай чиройли стадионда, мухлислар қаршисида ўзларини синаб кўришлари кераклигини уқтирдим. Бу ўйин бизга катта дарс бўлади. Темур Ҳакимов? Унинг кичик жароҳати борлиги сабаб ўйнатмадик. Шунингдек, Магдеев ва Раҳимовда жароҳат мавжуд. Биринчи лигадаги бош мақсадимиз? Ҳар бир ўйинда ғалаба қозониш вазифамиз. Шу вазифадан келиб чиқиб бош мақсад сари одимлаймиз“, – дея ўз фикрларини билдириб ўтди Элдор Сакаев.