Буюк Британиянинг Ноттингем шаҳрида давом этаётган "AEGON Open" теннис турнири ўзининг қизғин палласига кириб келмоқда. Қизиғи шундаки, унда иштирок этаётган мамлакатимизнинг биринчи рақамли ракетка устаси Денис Истомин ярим финал йўлланмасини қўлга киритди, деб ёзади sports.uz.
Мазкур босқичда ҳамюртимиз ATP рейтингида 21-поғонада бораётган аргентиналик Леанардо Майерни 2 соату 18 дақиқа давом этган муросасиз ва қийин кечган беллашувда 6/3, 6(8)/7, 7(6)/6 ҳисобларида таслим этди. Ушбу натижадан сўнг томонларнинг ўзаро учрашувлари 2:1 кўринишини олди. Албатта, Денис фойдасига.
Истоминнинг ярим финалдаги рақиби италиялик Симоне Болелли мусобақадан чиқариб юборган кипрлик Маркос Багдатис бўлади.
AEGON Open
Ноттингем, Буюк Британия
21 – 27 июль 2015
Мукофот жамғармаси – 644 065 фунт
Чорак финал
Маркос Багдатис (Кипр) – Симоне Болелли (Италия) - 6:4, 6:4
Денис Истомин (Ўзбекистон) – Леонардо Майер (Аргентина) - 6:3, 6:7, 7:6.
Кейинги ярим финал иштирокчилари қуйидаги жуфтликлари баҳсларидан сўнг маълум бўлади.
Сэм Куэрри (США) – Жиль Симон (Франция)
Александр Долгополов (Украина) – Лу Ен-Хсунь (Тайвань)
