Мамлакатимизнинг биринчи ракеткаси Денис Истомин Ноттингемдаги кечаги тарихий ғалабаси ҳақида турнир расмий сайтига интервью бериб, ўз таассуротлари билан ўртоқлашди.

“Ўзи одатда турнирларга бир ёки иккита учрашувда ғалаба қозониш учун келаман. Бу сафар мен олдинга катта бир қадам ташладим ва фаолиятимдаги илк титулимни қўлга киритдим. Иккинчи сетнинг тай-брейкида ҳисобнинг қандай эканлигини унутиб ҳам қўйдим ва шунчаки курашдим. Якунда эса сетни ўз фойдамга ҳал қилдим.

5:2 ҳисобида олдинда борган сетимни ютқазиб қўймасликни жуда ҳам истагандим. Албатта, ниятимга етганимдан жуда ҳам хурсандман. Бунинг учун узоқ муддат ва жуда кўп меҳнат қилдим. Ўйлайманки, бу ютуқ билан чекланиб қолмайман. Дарвоқе, финал баҳси якунланганидан сўнг онам ўтирган секторга қарадим. Не кўз билан қарайки, онам жойида йўқ эди. Хурсандчилигидан марказий кортни тарк этибди. Табиийки, у бу ишни ўзида йўқ мамнунлигидан қилган”, - деди Истомин.