Испания футбол лигаси (LFP) 2022 йилда Қатарда бўлиб ўтадиган жаҳон чемпионатини қишда ўтказилишига қарши Спорт арбитраж судига шикоят қилди.
LFP президенти Хавьер Тебас бу билан клублар манфаатини ҳимоя қилмоқчи эканлигини маълум қилди.
"Жаҳон чемпионатининг қишда ўтказилиши бизнинг 65 миллион евро йўқотишимизга олиб келади", - дейди Тебас.
Испанларнинг судга мурожаатини премьер-лига, бундеслига ва А серияси қўллаб-қувватладилар. Аммо бу қўллаш фақат маънан бўлиб қолмоқда. Лигалар ФИФА билан зиддиятга бориб қолишдан қочиб, келишувни имзоламадилар.
Таъкидлаш жоиз, УЕФА клублар манфаатлари учун ФИФА қарорига қарши чиқмади. Мишель Платини ва Зепп Блаттер ўртасидаги турлича фикрларга қарамай, УЕФА президенти мусобақанинг қишда ўтказилиши ўйинчилар ва мухлислар фойдасига ишлашини таъкидлаган.
Эслатиб ўтамиз, ФИФА 2022 йилги Қатардаги жаҳон чемпионатини ноябрдан декабргача ўтказилишини эълон қилган эди.
