"Қизилқум" — "Нефтчи" жамоалари учрашувидан сўнг, фарғоналиклар клуб раиси Тоҳир Копадзе журналистлар қизиқтирган саволларга жавоб қайтарди, дея хабар бермоқда "Қизилқум" расмий сайти.
— Бугун ўйинда жанговор дуранг қайд этилди, — дея сўз бошлади Тоҳир Копадзе. — Навоийга фақат ғалаба илинжида келгандик. Учрашув давомида жамоамиз бир қатор голли вазиятларни юзага келтиришди. Бироқ имкониятдан унумли фойдаланишда йигитларимизга омад кулиб боқмади.
Агар иккинчи бўлимда Муҳсинжон Убайдуллаев майдондан четлатилмаганда, балки бугун уйга ғалаба билан қайтган бўлармидик?! Шунга қарамай, сафарда бир очкони қўлга киритганимиздан хурсандмиз.
Меҳмондаги ўйинларда асосан бир ҳужумчи билан ўйнашга ҳаракат қиламиз. Шу боис, Шерзод Ҳакимовни захирадан майдонга туширдик.
"Қизилқум" анча шаклланган, яхши савиядаги легионерларга эга жамоа. Навоийда уларга қарши ўйнаш ҳар қандай жамоага қийинчилик туғдириши табиий. Ўз мухлислари қаршисида тўп сурганда ҳар қандай жамоада қўшимча куч пайдо бўлади. Бугун жиддий рақибга қарши нафақат дарвозабонимиз, балки бутун жамоа чиройли футбол намойиш этди. Ўз навбатида олис Фарғонадан бизни қўллаб-қувватлаш учун Навоийга ташриф буюрган ишқибозларимизга раҳмат айтаман.
