Якунланган мавсумда кучли бешлик чемпионатларида ёрқин ўйинлар намойиш этган футболчиларга бир қатор етакчи клублардан таклифлар бўлиши табиий. Аммо ўша ўйинчилар тўп сурадиган жамоалар ўз етакчиларини сафларида олиб қолишга ҳаракат қилишлари керак. Қуйидаги мақоламизда шундай футболчилардан айримлари билан таништирамиз.
Поль Погба, «Ювентус»
Полнинг «Ювентус» футболкасида ҳаракатланиши оддий ҳолга айланиб улгурган. «Кекса синьора»нинг ЕЧЛ финалига чиққани эса клубнинг аввалдан етакчи бўлиб келганлиги исботидир. Италия футболининг барча қийинчиликларини бошдан кечирган Турин жамоасига айни пайтда фаолиятининг чўққисидаги футболчи керак. Бу эса айнан Поль Погбадир.
Погба етакчи футболчилар қаторидан ўрин олиб улгурди. Албатта, «Ювентус» Полнинг трансферидан яхшигина даромад ишлаб олиши мумкин. Лекин франциялик ярим ҳимоячини сотишганидан кейин туринликлар Погбанинг ўрнини боса оладиган футболчи топа олишармикин?
Уго Льорис ва Гарри Кейн, «Тоттенхэм»
«Тоттенхэм» президенти Даниэль Леви клуб футболчиларини сотиш бўйича анчагина тажрибага эга инсон. Аммо ўйинчилар сотилганидан кейин ҳам жамоада ижобий ўзгаришлар юз бермади. Бэйлнинг трансферидан топилган 100 миллион евронинг ҳам қаерга ишлатилганлиги номаълум. Энди Леви бошқачароқ йўлни танлаган кўринади. Уго Льорисга анча вақтдан буён етакчи клублар даъвогарлик қилишмоқда. Улардан бири «Манчестер Юнайтед». Боиси, «қизил иблислар» «Реал»га кетиши аниқ бўлган де Хеанинг ўрнини тўлдиришлари лозим.
Кейн ўтган мавсумда премьер-лигада 21та голга муаллифлик қилди. Шу сабабли, Кейннинг бошқа жамоадан қўним топиши борасидаги миш-мишлар кундан-кунга кўпайиб бормоқда. Гаррининг «Реал», «МЮ» ва «Челси»га ўтиши тўғрисидаги миш-мишлар кўпайиб кетди.
Хабарларга кўра, клублар Льорисга 35 млн. евро, Кейн учун 65 млн. евро таклиф қилишмоқда. Лекин Леви ҳали бу таклифларга ижобий жавоб қайтармади. Бундан кўриниб турибдики, «Тоттенхэм» ниҳоят, узоқ йиллик жамоа тузишга қарор қилган. Демак, ушбу футболчилар ҳам лондонликлар сафини тарк этишмайди. Чунки барибир сотилган ўйинчининг ўрнини унинг ўзига ўхшаган футболчи билан тўлдириш осон иш эмас.
Кристиан Бентеке, «Астон Вилла»
Кристиан — жаҳон савиясидаги ҳужумчи. Аммо футболчининг маоши бироз камроқ. Шунинг учун у ойлигини оширишларини талаб қилмоқда. Лекин «Астон Вилла» ҳам уни жамоада қолишга мажбурлаётгани йўқ.
«Бентекени клубимизда яна бир мавсум ушлаб турмоқчимиз. У 30тача гол уриб, ўз маҳоратини намойиш этганидан сўнг «Реал»га сотамиз!» - деган эди Тим Шервуд.
Шервуд қисқа вақт давомида Бентекедан қандай фойдаланиш кераклигини кўрсатди. Англия чемпионатидаги камтарин жамоалардан бири бўлган «Астон Вилла» чинакам меҳнатлари эвазига ўтган мавсумда Англия кубоги финалигача етиб борди. Бентеке ҳам ушбу клуб савиясидаги футболчи бўлиб, у ҳозир клубдан миннатдор.
Эден Азар, «Челси»
«Реал» Азарни сотиб олмоқчими? Қандини урсин! Унинг ҳар бир оёғи - 100 миллион фунт туради. Қўшимчасига мен «Реал»нинг 3 нафар энг яхши футболчисидан бирини қўлга киритмоқчиман. Шундай келишув мени қониқтиради!» - деб изоҳ берган эди Жозе Моуриньо бельгиялик ярим ҳимоячининг «Қироллик клуби»га ўтиши тўғрисидаги миш-мишларга жавобан.
АПЛда юқори савияда ўйин кўрсатиш осон эмас. Ҳаттоки, Италия ва Германия чемпионатларида ҳам бундай босим йўқ. Азар айни пайтда «Челси»нинг юраги ҳисобланади ва уни сотиш режасидан умуман воз кечилиши керак. Азар ёрқин ўйинлари эвазига якунланган мавсумда Англиянинг энг яхши футболчиси, деб топилди. Тўғри, бу номга «Манчестер Юнайтед» жамоаси дарвозабони Давид де Хеа ҳам муносиб эди. Лекин «Челси» - «Манчестер Юнайтед» учрашувида Азарнинг голи ўйин тақдирини ҳал қилди. «Қизиллар» дарвозасини эса айнан испаниялик дарвозабон қўриқлаганди. Азардек футболчини сотиш яхшиликка олиб келмайди. Эден очилмаган қирраларини айнан «Челси»да намоён этиб, келажакда «Олтин тўп»га даъвогарлик қилиши ҳам эҳтимолдан холи эмас.
Марко Ройс, «Боруссия» Д.
2019 йилгача тузилган шартномага кўра, Ройснинг Германияда қолиши даргумон. Дортмундликлар тўпурар ярим ҳимоячини арзон нархга сотмоқчи эмаслар. Балки, воқеалар ривожи биз кутмаган даражада буткул ўзгариб кетар? «Реал», «Арсенал» ва «Бавария»дек жамоалар Маркони харид қилишмоқчи. Фақатгина «Бавария» хавбек учун расман 35 миллион евро таклиф қилди.
«Боруссия»нинг янги мавсумдаги мақсадлари улкан. Кагава, Гётце, Левандовски ва бошқа ўйинчиларнинг тақдирлари сизга маълум. Юрген Клопп эса жамоа етакчиларисиз ҳам « Боруссия» билан муваффақиятга эришиш йўлини ўйлаб топди. Дортмундликларнинг якунланган мавсумдаги муаммолари жамоанинг ички муҳитига тегишли. «Боруссия» вакиллари охиригача яхши ўйин кўрсатишга ҳаракат қилишди.
Яхши томони, дортмундликларнинг янги устози Томас Тухель «Майнц»да фаолият юритган ва мазкур жамоанинг таркиби «Боруссия»никидек эмас. Балки шу сабабли Тухель янги мавсумда жамоани бошқаришда қийинчиликларга учрамас. Ройснинг масаласига тез кунлар ичида ойдинлик киритилади.
Акмалхон Эшонхонов тайёрлади
