Жанубий Корея Кей лигасининг 20-тур баҳслари якунига етди. Ушбу турда "Улсан Хёндэ" клуби "Чоннам Драгонс" меҳмони бўлди.
Улсанликлар чемпионатнинг 2-босқичига йўлланма олиш имкониятини сақлаб қолишлари учун фақат ва фақат ғалаба қозонишлари шарт эди. Аммо "Чоннам" рақибига очко бермади. Баҳснинг 20 ва 68-дақиқаларида мезбонлар "Улсан" дарвозасига иккита гол уришга муваффақ бўлди. Ўйин тугашига 4 дақиқа қолганида Сервер Жепаров пенальтидан битта жавоб тўпини киритди. Қолган дақиқаларда Жепаров жамоаси мағлубиятдан қутулиб қола олмади.
Биринчи босқич тугашига 2та тур қолганида "Улсан" 20 очко билан 10-ўринни эгаллаб турибди. Улар кучли олтиликка кириш имкониятини қўлдан чиқаришди. Демак, Жепаров ўз жамоаси билан иккинчи босқични қуйи гуруҳда Кей лигада жон сақлаб қолиш учун курашади, холос.
