Қатарнинг "Ал-Жайиш" клуби ўзбекистонлик футболчи Сардор Рашидов билан шартнома имзолангани ҳақида расмий хабар тарқатди. Ҳамюртимиз аввал тиббий кўрикдан ўтди ва шундан сўнг "Жайиш" билан 3 йиллик шартномага имзо чекди.
Қатар жамоаси раҳбари Юсуф Дасмал Куварий ўзбекистонлик ҳужумчи "Ал-Жайиш" сафида муваффақиятга эришишига умид билдирди.
"Янги мавсум бошланишидан аввал сафимизни яхши ўйинчи билан кучайтирдик. Рашидов жуда яхши футболчи. Жамоамизнинг франциялик бош мураббийи Сабри Моше унинг ёрдамида ҳужум чизиғимизни яна кучайтиради, деб ўйлайман.
Сардор Рашидов тез кунда матбуот анжумани орқали кенг жамоатчиликка таништирилади.
"Ал-Жайиш" август ойидан бошлаб Қатар юлдузлар лигасининг янги мавсумида иштирок этади. Февраль ойида эса Осиё чемпионлар лигасининг саралаш босқичидан иштирокини бошлайди.
