Спорт арбитраж суди (CAS) УЕФАнинг Евро-2016 йилги саралаш баҳслари доирасидаги Сербия ва Албания учрашуви бўйича қарорини бекор қилди. Бу ҳақда ташкилот расмий сайти хабар тарқатди.
2014 йилнинг октябрида бўлиб ўтган Сербия ва Албания терма жамоалари ўртасидаги учрашув ниҳоясига етмаган (0:0), ўйинда келиб чиққан жанжал туфайли кейинчалик Албанияга техник мағлубият ёзилган ҳамда Сербиядан ҳам уч очко олиб ташланганди.
Эндиликда янги қарорга мувофиқ мазкур ўйинда Албанияга техник ғалаба ёзилди. Сербиядан олиб ташланган уч очко бўйича қарор ўз кучида қолдирилди. Натижада Албания терма жамоаси тўплаган очколари сони 10тага етди ва албанлар "I" гуруҳида Дания терма жамоаси билан иккинчи ўринни бўлиб туришибди.
