"Локомотив" футбол мактаби тарбияланувчилари "Ёз - ёз ўтади соз" шиорига амал қилган ҳолда ёзги таътилни мароқли ўтказишмоқда. Шу кунларда ёш футболчиларимиз "Стадион" деб номланган Янгиердаги спорт комплексида ёзги таътилни ўтказишмоқда.

Футбол мактабимиз директори Эркин Саидовнинг маълум қилишича, 3 июлдан бошланган таътил 13 июлгача давом этади.

"Ҳозир Янгиер шаҳридаги спорт комлпексида 2004, 2005, 2006 ва 2007 йилларда туғилган футболчилардан иборат жами 35 нафар тарбияланувчимиз ёзги таътилни ўтказишмоқда, - дейди Эркин Орифович. - Бу ерда ҳар кунги футбол машғулотларидан ташқари назорат баҳслари ташкил қилинмоқда. Куни кеча 2004-2005 йилларда туғилган футболчиларимиз Гулистоннинг "Локомотив-БФК" тарбияланувчиларига қарши ўртоқлик ўйини ўтказиб, бунда бизнинг футболчилар 2:1 ҳисобида ғалаба қозонишди. Яқинда эса бўш вақт топиб болакайлар билан Самарқандни айланиб келдик. Футболчиларимизга тарихий обидаларни кўрсатдик. Улар бундан жуда завқ олишди. Бундан ташқари, мураббийлар ҳар куни болаларга футбол назарияси бўйича дарс ўтишяпти. Шунингдек, болажонларимиз зерикиб қолмаслиги учун шахмат, шашка мусобақаларини ташкил этяпмиз ҳамда байрам тадбирларини уюштиряпмиз".

Айтиб ўтганимиздек, футбол мактабимиз тарбияланувчилари Янгиерда 13 июлга қадар бўлишади. Шундан кейин футболчиларимиз Тошкентга қайтиб, болалар ва ўсмирлар чемпионатининг иккинчи босқич ўйинларига тайёргарлик кўришади. Бизга маълум бўлишича, Тошкент шаҳар болалар чемпионатининг ҳал қилувчи босқичи августдан старт олади.