Ҳозиргина Лондон шаҳрида “Катта Дубулға” туркумига кирувчи йилнинг тўртта нуфузли турниридан учинчиси ҳисобланган “Уимблдон”нинг эркаклар ўртасидаги мусобақаси якунланди.
Ҳал қилувчи финал учрашувига етиб келган сайёрамизнинг биринчи ва иккинчи рақамли теннис юлдузлари сербиялик Новак Жокович ҳамда швейцариялик Рожер Федерер марказий кортга йиғилган мухлисларга ажойиб теннис спектаклини намойиш этиб беришди.
Дастлабки сет тай-брекда Жокович фойдасига ҳал бўлди. Иккинчи сет ҳам тай-брекка қадар чўзилди ва узоқ давом этган баҳсда 12:10 ҳисобида Рожер зафар қучди. Учинчи сетнинг ярми ўтиб бораётган бир паллада Лондонда ёмғир ёға бошлади. Ташкилотчилар баҳсни вақтинча тўхтатиб туришди.
Чамаси 15 дақиқалик танаффусдан сўнг баҳс яна давом эттирилди ва учинчи сетни Новак 6:4 ҳисобида ютиб олди. Тўртинчи сетда эса рақибига нисбатан ёшроқ бўлган сербиялик теннисчи 6:3 ҳисобидаги ғалабани тантана қилди. Шу тариқа, 2 соату 55 дақиқа давом этган учрашувда 7/6(1), 6/7(10), 6/4, 6/3 ҳисобида зафар қучган Новак Жокович ўз фаолиятида учинчи маротаба “Уимблдон” турнири бош мукофотини қўлга киритди.
