«Зенит» бош мураббийи Андре Виллаш-Боаш Россия Суперкубоги доирасида «Локомотив»га қарши ўйиндан кейин Россия Премьер-лигасига жорий қилиниши кутилаётган "6+5" легионерлар лимити борасида Sovsport.ru мухбири саволига жавоб берди.

"Ҳали қарор қабул қилинмади, лекин мен унинг қабул қилинишини кутмоқчи ҳам эмасман. Тушунарлики, «6+5» учун овоз беришади. Бу Россия футболи тамом деганидир. Бу қарор таркибдаги рақобатни кучсизлантиради, еврокубокларда жамоани заифлаштиради. Тарихда илк марта Чемпионлар лигаси биринчи саватчасига тушганимизда кучли жамоани шакллантиришимизга халал беради. Россиялик футболчилар хорижлик кучли футболчилар билан ёнма-ён ўйнашига ва ривожланишига халақит беради. Бу қарор футболчиларни дангаса қилиб қўяди. Россия футболининг муаммоси лимитда эмас, пастроқ даражада: болалар футболи, майдонлар, мураббийларни тайёрлаш тизими ва бошқаларда, асло лимитда эмас. Такрорлайман: «6+5» лимити - қабул қилиниши мумкин бўлган қарорлар ичида энг ёмони. У Россия футболини ўлдиради", - дейди Виллаш-Боаш.

Маълумот учун: "6+5" тизимида майдонда бир вақтнинг ўзида энг кўпи билан 6 нафар легионер ҳаракат қилиши мумкин. Қолгани россиялик футболчилар бўлиши лозим.