Эртага “Спорт” телеканали орқали соат 18:50да “Шоҳсупага йўл” ток-шоусининг навбатдаги сони эфирга узатилади. Унда Ўзбекистон миллий терма жамоаси катта мураббийи, Янги Зеландиядаги ёшлар ўртасидаги жаҳон чемпионатида ёшларимизга устозлик қилган малакали мутахассис Равшан Ҳайдаров иштирок этади.
Кўрсатувда шунингдек, Жаҳон чемпионатида мамлакатимиз шарафини муносиб ҳимоя қилган ёш футболчилар ҳам иштирок этиб, кичик мундиал таассуротлари ҳамда келгусидаги режалар ҳақида ўз фикрларини билдириб ўтишади.
Хабарингиз бор, Равшан Ҳайдаров бошчилигидаги Ўзбекистон ёшлар терма жамоаси Янги Зеландия мамлакати мезбонлик қилган ёшлар ўртасидаги ЖЧ чорак финалида Сенегалга кичик ҳисобда мағлуб бўлиб, мусобақадаги иштирокини тўхтатганди.
Эслатиб ўтамиз, 30 июнь куни соат 19:10 да “Спорт” телеканали орқали эфирга узатилган “Соккер клуб” кўрсатувида Ўзбекистон ёшлар терма жамоасининг жаҳон чемпионатидаги иштироки ва танланган ўйин услуби жиддий танқид остига олинганди.
Футболчилардан Забиҳулло Ўринбоев, Миржамол Қосимов, Элдор Шомуродов, Достон Ҳамдамов, Акром Комилов, Отабек Шукуров, Рустам Ашурматовлар ёшлар жамоасида мураббийларнинг кетма-кет алмашинуви натижага ўзининг салбий таъсирини кўрсатгани ҳақида айтишган. Бу борада улар Алексей Евстафеев, Сергей Лушан ҳамда Равшан Ҳайдаровнинг ўйин услубини очиб беришга ҳаракат қилишганди.
