Биласиз, ҳозирда Европадаги кўплаб жамоалар янги мавсумга тайёргарлик олиб боришмоқда. Кўхна қитъанинг баъзи бир чемпионатлари эса аллақачон старт олишга улгурди.
Ҳамюртимиз Ҳусниддин Ғофуровнинг Сербия супер лигасида ўйнашидан хабарингиз бор. Серб юртида ўтган ҳафта дам олиш кунлари янги мавсум бошланди. Миллий терма жамоамизга номзод саналаувчи Ҳусниддин тўп сурадиган “Явор” жамоаси илк турда “Нови Пазар” клуби меҳмони бўлди ва кичик ҳисобда зафар қучиб, чемпионатни ғалаба билан бошлади. Ҳамюртимиз билан боғланганимизда, у мазкур беллашувнинг анчагина қийин ўтганини таъкидлади.
“Учрашув кутганимиздек қийин ўтди. Рақиб ҳам ёмон ўйнамади. Лекин омад биз томонда бўлди ва ғалабага эришдик. Янги мавсумни ғалаба билан бошлаганимиздан хурсандман”, - дейди ёш футболчи SPORTS.uz сайтига.
Мазкур матчда Ҳусниддин асосий таркибда майдонга тушди ва 60 дақиқа ўйнади. Ҳамюртимиз 60-дақиқада Боян Цезаричга алмаштирилди. Энди 2-турда иваницаликлар “Спартак”ни ўз уйида қабул қилишади. Учрашув 25 июл шанба куни ўтказилади. Ҳусниддиннинг асосий таркибда майдонга чиқишига ва жамоасига фойда келтиришига умид қиламиз.
