Ўзбекистон миллий терма жамоаси бош мураббийи Самвел Бабаян мамлакат олимпия терма жамоасига қарши назорат ўйинидан кейин Sports.uz сайти мухбирига фикрлари билан ўртоқлашди.

«Жанговар ўйин бўлди. Ҳар иккала жамоа ўзини кўрсатишга ҳаракат қилди, ўйин курашларга бой бўлди. Учрашув ўзининг руҳияти билан расмий ўйинга яқин бўлди. Кўп маълумотларга тўпладик. Улар бизга таркибни шакллантиришда ёрдам беради. Салбий жиҳатларни ҳам инобатга олиб қўйдик. Эртага машғулотда барчасини муҳокама қиламиз.

Олимпия терма жамоаси миллий терма жамоага нисбатан яхшироқ ўйнади? Бу ерда сиз билан баҳслашишим мумкин. Назаримда, миллий терма жамоанинг ҳужумлари хавфлироқ чиқди. Иккинчи бўлимда олимпиячилар ҳудудий устунликка эга бўлган бўлсалар-да, лекин биз ўйин темпини йўқотиб қўймадик. Ўйин давомида Соҳибов жароҳат олди ва уни алмаштиришга тўғри келди. Бунинг оқибатида таянч зонамиз кучсизланиб қолди.

Иккинчи ўйин бугунгидан кескин фарқ қилади. Биз оптимал таркиб билан ўйнамоқчимиз. Кўрамиз, қандай ўйин бўлар экан», – дейди Самвел Бабаян.