Жанубий Кореяда Олимпиада ўйинлари дастуридан ўрин эгаллаган Таэквондонинг WTF йўналиши бўйича ўтказилаётган нуфузли халқаро турнирда Ўзбекистон таэквондочилари томонидан ўтган олти кунлик мусобақалар якунларига кўра қўлга киритган медаллари сони 32 тага етди.
Катталар ўртасида ўтказилаётган мамлакат очиқ чемпионатида бугунги кунга қадар уч нафар спортчимиз – булар амалдаги жаҳон чемпиони Дмитрий Шокин (+87 кг), Жасур Бойқўзиев (-87 кг) ва Мустафо Валиев (-58 кг) барча рақибларини мағлуб этиб олтин медалга сазовор бўлдилар.
Эслатиб ўтамиз, катталар ўртасида ўтказилаётган мусобақада 2016 йили ўтказиладиган XXXI ёзги Олимпиада ўйинларининг йўлланмалари учун рейтинг очколар ўйналмоқда. Мазкур мусобақада ғолиблик шоҳсупасига кўтарилиб, 20 тадан рейтинг очкога эга бўлган уч нафар юртдошимиз дунё рейтинг жадвалида тутган ўрниларини янада яхшилаб олдилар.
Маълумки, мазкур очиқ чемпионатда ёшлар, ўсмирлар ва пумсе йўналиши бўйича ҳам мусобақалар ўтказилмоқда. Унда иштирок этаётган умидли ёшларимиз бугунга қадар 11 та олтин, 11 та кумуш ва 7 та бронза медалини қўлга киритиб, Ўзбекистонда янгидан-янги иқтидорлар камолга етаётганлигини амалда яна бир бора исботлашмоқда.
Бугун Корея очиқ чемпионатида сўнгги кун мусобақалари бўлиб ўтади.
