Тошкентнинг “Локомотив” клуби ҳозирда Олий лиганинг иккинчи даврасига Австрияда ҳозирлик кўрмоқда.
Мазкур йиғин доирасида “темирйўлчилар” бир қатор кучли жамоалар билан синов-назорат баҳсларида ҳам майдонга тушишяпти. Австрияда олиб борилаётган ушбу тайёргарлик йиғинининг қандай ўтаётганини билиш мақсадида “Локомотив” ҳимоячиси Бобур Юлдашев билан боғландик.
- Бобур, “Локо”нинг Австрияда олиб бораётган йиғини қандай кетмоқда?
- Жамоамиз иккинчи даврага кўтаринки кайфиятда тайёргарлик кўрмоқда. Йиғинимиз Австрияда олиб бориляпти. Мураббийларимиз ўтказаётган машғулотлар жуда қизиқарли тарзда кечяпти. Бу орқали секин-аста жисмоний ва руҳий тайёргарлигимизни маъромига етказиб оламиз. Қолаверса, бир нечта кучли рақиблар билан ўртоқлик ўйинлари ҳам ўтказилаётганини таъкидлашим лозим.
- Ўтказилаётган ўртоқлик учрашувлари борасида нима дея оласиз?
- Йиғин давомида 4 та ўйин ўтказишни режалаштиргандик. Мана 3 тасини ўтказиб бўлдик. Кўрсатган ўйинига кўра рақибларга баҳо берадиган бўлсам, жуда кучли ва яхши тайёргарликка эга жамоалар билан баҳс юритдик. Бундай учрашувлар хатоларимизни билиб олиш ва уларни кейин машғулотларда бартараф этиш учун ажойиб имкониятдир.
- Нима деб ўйлайсиз, “Локомотив” иккинчи даврани барқарор ўтказа олармикан…
- Ҳа, албатта! Биз иккинчи даврани кўтаринки кайфиятда ўтказиш ниятидамиз. Шу боисдан ҳам давралар оралиғидаги йиғинда яхши ҳозирлик кўряпмиз. Мураббийларимиз ҳам бу борада биз билан жиддий ишлашмоқда. Насиб этса, иккинчи даврани бир текисда ўтказамиз ва якунда бош мақсадимиз – чемпионликни қўлга киритиб, жамоамиз ишқибозларини хурсанд қиламиз!
- Ўзингиз ҳам “Локомотив”нинг асосий таркибига киришга уринсангиз керак…
- Ҳа, шундай! Бор куч-ғайратимни ишга солган ҳолда иккинчи даврада асосий таркибдан ўрин олишга уринаман. Ҳозир ҳам машғулотларда қаттиқ ишлаяпман. Агар ўз устимда ишлашда давом этсам, мураббийларимиз имкон тақдим этишади. Мен эса ўша имкониятдан унумли фойдаланиб, уларнинг ишончини оқлашга ҳаракат қиламан.
- Омад тилаймиз!
- Раҳмат!
Зоҳирбек Акрамхонов суҳбатлашди
