Австрияда ташкил қилинган ўқув-йиғин машғулотларини якунлаб Тошкентга қайтган “Локомотив” бугун яна ўз қароргоҳида йиғилади. “Темирйўлчилар” бугундан мавсумнинг иккинчи ярмига тайёргарликни давом эттиришади.
Хабар берганимиздек, “Локомотив” Австриядаги йиғин чоғида тўртта ўртоқлик учрашуви ўтказди. Бунда футболчиларимиз катта тажриба тўплашди ва мана энди орттирилган тажрибани иккинчи давра ўйинларида қўллаш фурсати етди. “Локомотив”ни мавсумнинг иккинчи ярмидла бир-биридан қизиқ баҳслар кутиб турибди.
Жамоамиз 3 август куни ўз майдонида “Металлург”ни қабул қилади. Мазкур беллашув билан олий лиганинг иккинчи давра ўйинларига старт берилади. Бундан ташқари, жамоамиз Ўзбекистон Кубоги ярим финалида “Насаф”га қарши иккита ўйин ўтказади.
Ҳозирда “темирйўлчилар” олий лига мусобақа жадвалида 2-ўринда боришяпти. Барчамизнинг мақсадимиз битта: мавсумни биринчи ўринда тугатиб, чемпионликни қўлга киритиш. Бунинг учун “Локомотив” ПФК бор кучини ишга солади. Мухлисларимиздан эса бизни охиригача қўллаб туришларини сўраймиз, дейилади клуб расмий сайтидаги хабарда.