Яқинда “Қўқон-1912” жамоаси бош мураббийи Рустам Абдуллаев “Футбол Экспресс” газетаси мухбири билан суҳбатда бўлди. Қуйида мана шу интервьюни ҳукмингизга ҳавола этамиз.
“Қўқон-1912” клуби ҳам тузиб чиқилган режа асосида тайёргарлик кўришди. Бу жамоа биринчи даврада мухлисларини у қадар хурсанд қила олгани йўқ. Шу боис давралар оралиғида йўл қўйилган хатолар устида ишлаб, таркибни ҳам кучайтиришга ҳаракат қилдилар. Бу борада бош мураббий Рустам Абдуллаев ўз фикрлари билан ўртоқлашди.
- Тайёргарлигимизни Красногорскда ўтказдик. У ерда “Навбаҳор” ва “Қизилқум”га қарши иккита ўйин ўтказдик. Ҳозирда Қўқонда машғулотларни олиб боряпмиз. Ҳаммаси режамиз асосида ўтди. Фақат айрим ўйинчиларимизда жароҳатлар бор. Иккинчи даврадан умидимиз катта. Бир қатор янги футболчиларни олдик, - дея гап бошлади, Абдуллаев.
- Янги қўшилган ўйинчилар ҳақида аниқроғ маълумот берсангиз?
- Бир нечта ўйинчи клубни тарк этди ва уларнинг ўрнига янгиларини олиб келганмиз. Лекин уларни асосий таркибда ўйнайди деб кафолат бермайман. Ҳаммаси ўзларига боғлиқ. “Сўғдиёна”дан Суҳроб Қобилов ва Илҳом Комилов, “Нефтчи”дан эса Ойбек Нурбоев ҳамда Отабек Ҳайдаров қўшилишган. Яна айрим ўйинчилар билан музокара олиб боряпмиз.
- Селекция ишларидан қониқиш ҳосил қиляпсизми?
- Селекция ҳақида гапирадиган бўлсам, барибир ўзим хоҳлаган футболчиларни қўлга киритишимиз жуда қийин. Чунки бошқаларнинг ўз жамоалари билан шартномалари бор. Лекин таркибимизга келган ўйинчилардан қониқдим. Улар машғулотларда ўзини яхши томондан кўрсатишди. Жамоамиз ўйинига яхши қўшилиб кетишди.
- Яқинда қозоғистонлик Александр Киров келганди, аммо у тиббий кўрикдан ўта олмади...
- У ҳали ҳам сафимизни тарк этгани йўқ. Тўғри айни пайтда биз билан бирга эмас. Футболчи Тошкентда тиббий кўрикдан қайта ўтяпти. Чунки бу борада у билан айрим муаммолар юзага келганди.
- “Динамо”га қарши ўйин алоҳида қизиқишга сабаб бўляпти. Бу ўйиндан нимани кутяпсиз?
- Нимани кутаман? Фақат ғалабани кутаман. “Динамо”нинг ўйинларини кўришга имкониятим бўлмади. Улар Тошкентда шуғулланишди. Эшитдим, “Андижон”га 1:3 ҳисобида ютқазишибди. Илҳом Юнусов, Артём Филипосян, Дилшод Шарофутдинов сингари самарқандлик футболчилар “Динамо”га ўтишганини биламан. Ўйлайманки, Қўқонда янада қизиқарли ўйин бўлади.
ФИРДАВСХОН суҳбатлашди
“Футбол Экспресс” газетасидан олинди
