Давралар оралиғида жамоамиз сафига қўшилган ҳужумчи Наврўз Алимов иккинчи даврани “Навбаҳор”да ўтказмайдиган бўлди. Аслини олганда Алимов билан барча масалалар бўйича келишиб олинганди. Шу сабабли, ҳужумчи кейинги фаолиятини “Навбаҳор” билан боғлашга қарор қилганди.
Бош мураббий Бахтиёр Ашурматов билан боғланганимизда, ушбу маълумотни тасдиқлади. Алимов масаласида сўз юритган Ашурматов қуйидагиларни гапириб берди: “Алимовни таркибга қўшиб олиш борасида иккита минус жиҳам мавжуд эди. Биринчиси “Пахтакор”дан футболчини ижарага олиш масаласи эди. Иккинчиси эса молиявий ҳолат билан боғлиқ эди. Сабаби Алимов бир қатор клублардан таклиф тушганди. Шундай бўлсада, ҳужумчи “Навбаҳор”да ўйнашга розилик берганди. Лекин, унинг молиявий томондан қўйган талабини 30 июлгача ҳал қилиб беришимиз керак эди. Шундан сўнг уни шартномага имзо чекиши кўзда тутилганди. Афсуски, белгиланган муддат ичида молиявий муаммони ҳал қила олмаганимиз сабабли Алимов жамоада қолмади”.
Шу кунларда жамоамизнинг иккинчи даврага олиб борган тайёргарлик жараёни, селекция борасида олиб борилган ишлар борасида ва мухлисларни қизиқтирган бир қатор саволларга бош мураббий Бахтиёр Ашурматов ўз муносабатини билдиришни мақсад қилган. Бош мураббийнинг фикрларини бугун эрта сайтимизга жойлаштиришни режалаштирганмиз.
