“Қизилқум” жамоаси иккинчи давра учрашувларига қизғин ҳозирлик кўрмоқда. Навоийликлар 10 июлда пойтахтимиздаги “Футбол-МЕД” соғломлаштириш марказида тиббий кўрикдан ўтгач, бир ҳафта мобайнида Тошкент вилоятининг “Билдирсой” сиҳатгоҳида жисмоний тикланиш машғулотларини олиб борди.

Сўнгра ўқув-машғулот йиғини Тошкент шаҳрида давом эттирилди. Йиғин доирасида “Қизилқум” жамоаси “Қўқон-1912” жамоаси билан синов-назорат учрашувида майдонга тушди. Шунингдек, биринчи лига вакили “Ғиждувон” футболчилари билан ҳам ўртоқлик ўйини ўтказилди.

Давралар оралиғида кончилар таркибида бир қатор ўзгаришлар юз берди. Жумладан, ярим ҳимоячи Алишер Саноев “Бухоро” жамоасига ижарага берилди. Украиналик ҳужумчи Вячеслав Шевченко билан тузилган шартнома бекор қилинган бўлса, яна бир ҳужумчи Феруз Бобоқулов Самарқанд динамочилари таркибида иккинчи даврани давом эттиришга қарор қилди.

Иккинчи даврада Достон Абдураҳмонов (“Машъал”), Баҳром Нарзуллаев (“Бухоро”), Виктор Клишин (“Шўртан”), Наврўзбек Алимов (“Пахтакор”) каби футболчилар эса “Қизилқум” либосида майдонга тушадилар.

Эслатиб ўтамиз, навоийликлар 16-турда Жиззахда “Сўғдиёна” жамоаси меҳмони бўлади. Мазкур жамоаларнинг биринчи даврада Навоийда кечган дастлабки учрашувида кончилар йирик — 4:1 ҳисобида ғалаба қозонган. Унда Баҳриддин Ваҳобов “хет-трик” қайд этган бўлса, яна бир гол украиналик ҳужумчи Вячеслав Шевченко ҳисобига ёзилганди. Жиззахликлар ягона тўпга Музаффар Музаффаров муаллифлик қилган эди.