Яна бир неча кундан сўнг, Ўзбекистон XXIV миллий чемпионати олий лига жамоалари иккинчи давра баҳсларини бошлашади.
Дастлабки давра учрашувлари ниҳоясига етгач, “Қизилқум” ПФК Матбуот хизмати клуб расмий веб-сайти орқали жамоанинг “Энг яхши ўйинчиси” номинацияси бўйича мухлислар ўртасида сўровнома эълон қилганди.
Бугун мазкур сўров ўз якунига етди. Унга кўра, мингдан ортиқ мухлис овоз берган сўровномада миллий чемпионатимиз тўпурари, ҳужумчи Баҳриддин Ваҳобов энг кўп овоз тўплади. Сурхондарёлик футболчи биринчи давранинг “Қизилқум” таркибидаги “Энг яхши ўйинчиси” деб топилди. Баҳриддин сўровда жами — 323 овоз тўплаб, асосий таъқибчиларни катта фарқ билан ортда қолдирди.
Шунингдек, мазкур сўров якунлари бўйича Шерали Жўраев (189 овоз), Алишер Саноев (181) ҳамда Акмал Рустамов (172)лар кейинги поғоналарни эгаллади.
Навоийлик кўпсонли мухлислар номидан “Қизилқум” жамоаси аъзоларига иккинчи даврада ҳам чиройли ўйин ва ёрқин ғалабалар ёр бўлишини тилаб қоламиз.
