“Манчестер Сити” жамоаси ёзги трансфер пайтида қатор ўзгаришлар амалга оширишни мақсад қилишган. Клуб раҳбарияти ҳужум чизиғини кучайтириш учун айни пайтда бир нечта футболчиларни кузатишмоқда. Хусусан клуб вакиллари Карим Бенземани ўз сафига қўшиб олмоқчи. Инглиз клуби вакиллари Бензема трансфери учун 30 миллион фунт тўламоқчи. Бу трансфер амалга ошадиган бўлса, клуб тарихида энг қимматбаҳога харид қилинган навбатдаги ҳужумчига айланади. Аслида жамоа томонидан қайси ҳужумчи энг қимматга сотиб олинган? Буни билишни истайсизми? Қуйида бунга ўзингиз гувоҳ бўлишингиз мумкин.

Роке Санта Крус (Парагвай)

Трансфери нархи:17,5 миллион фунт.
Қачон сотиб олинган: 2009 йилнинг ёзида.
 
Парагвайлик ҳужумчи “Манчестер Сити”га келгунига қадар “Блэекбрен” сафида ажойиб ўйинлар кўрсатган. Шу сабабли уни сотиб олиш таклифини “шаҳарликлар” ўртага ташлаган. Узоқ давом этган музокаралардан сўнг эса трансфер масаласи аниқ бўлган. Роке Санта-Крус учун “шаҳарликлар” 17,5 миллион фунт стерлинг сарфлашди. Бироқ футболчи янги жамоасида ўзини кўрсата олмади. Икки мавсум мобайнида тўп сурганига қарамай, ўзини кўрсата олмади. Икки йил ичида ҳужумчи 24та учрашувда майдонга тушиб, атига 4та гол урди. Кейинчалик эса инглиз клуби хўжайинлари бўлган шайхлар парагвайлик футболчини “Малага” жамоасига текинга бериб юборишга аҳд қилишди.
 
Алваьро Негредо (Испания)

Трансфер нархи: 20 миллион фунт.
Қачон сотиб олинган: 2013 йилнинг ёзида.
 
Негредо “Севилья”да тўп сурган пайтида нафақат “Манчестер Сити”ни, шу билан бир қаторда “Реал”, “Тоттенхэм”, “Челси” сингари жамоаларни ақлини олганди. Тўпурарлик маҳоратини кўрсатишга одатланган Негредо “Манчестер Сити”га 20 миллион фунт стерлинг эвазига кўчиб ўтди. Минг афсуски, у ҳам муҳитга мослаша олмади ва етарлича ўйин амалиётига эга бўлмади. Натижада, футболчини “Валенсия”га ижарага беришни лозим топишди. Кейинги мавсумдан Негдеро “кўршапалаклар”да тўлиқ тўп суриши мумкин. Негаки, испанияликлар ватандошини трансфер ҳуқуқини буткул сотиб олишни режалаштиришган.
  
Стефан Йоветич (Черногория)

Трансфер нархи: 22 миллион фунт.
Қачон сотиб олинган: 2013 йилнинг ёзида.
 
Альваро Негредони сотиб олинган пайтда Стефан Йоветич ҳам харид қилинганди. “Фиорентина”да кўпчиликни ақлин олган ушбу ҳужумчи инглиз клубига қимматга тушди. Орадан икки йил ўтдики, Йоветич ўзига сарфланган маблағларни оқлаганича йўқ. Шу сабабли шу йилнинг ёзида футболчи кетиши кутилмоқда. Унга “Ливерпуль”, “Интер” жамоалари тарафидан жиддий қизиқиш бўлмоқда. Йоветичнинг Англияга келганидан сўнг тинимсиз жароҳатлар, ўйинларга мослашиб кета олмаслик сингари салбий жиҳатлар таъқиб қилди. Бунинг оқибатида футболчи ўз жойини йўқотганди. Эндиликда эса у кетиш истагини билдирган. У эндиликда “Интер” шарафини ҳимоя қилади.
 
Марио Б алотелли  (Италия)

Трансфер нархи: 25 миллион фунт.
Қачон сотиб олинган: 2010 йилнинг ёзида.
 
Жанжалкаш, тўполлончи, беори сингари лақабларни олган Марио Балотеллини “Манчестер Сити”га ўтганидан сўнг анча босилиб қолишини тахмин қилишганди. Бироқ барчаси тескарисига айланди. Бу ерда футболчи Роберто Манчини билан тортишиб қолаверди. Ҳаттоки, машғулотлар вақтида бир неча маротаба ўзаро келишмовчилик бўлганлигини кўпчилик яхши билади. Балотелли Англияда ёрқин ўйинлар кўрсатмади. Гоҳида, гол киритмаганини инобатга олмаганда, ёрқин тарафдан ўзига нисбатан ишлатилган маблағларни оқлаганича йўқ. Хуллас, Марио ҳам бу клубда шунчаки вақтни ўтказди. Бу билан эса анча-мунча даромад қилди холос. Ҳозирда футболчи Англиянинг яна бир бошқа жамоаси “Ливерпул”да тўп сурмоқда.
 
Эммануэль А дебайор  (Того)

Трансфер нархи: 25 миллион фунт.
Қачон сотиб олинган: 2009 йилнинг ёзида.
 
Биласизми, “Манчестер Сити” клуби хўжайинлари бўлган араб шахлари пулларни сарфлашда ўйланиб ўтиришмайди. Аксинча, катта харидларни амалга оширишда давом этади. Буни “Арсенал”да тўп суриб келган Адебайор трансфери хусусида ҳам шундай дейиш мумкин. Ўша пайтларда тоголик ҳужумчи яхши даражадаги ўйинчи ҳисобланарди. Шунинг учун ҳам “шаҳарликлар” Адебайор учун 25 миллион фунт стерлингга харид қилди. Биринчи мавсумида у 14 маротаба гол урди. Кейинги мавсумда эса таркибда бошқа ҳужумчилар сотиб олинганидан сўнг заҳирада қолиб кетишига тўғри келди. Бу футболчи ҳам катта маблағларга яраша ўйин кўрсатган дейиш қийин.
 
Вильфрид Б они ( Кот- Д ’ Ивуар)

Трансфер нархи: 25 миллион фунт.
Қачон сотиб олинган: 2015 йилнинг қишида.
 
“Суонси”дан сотиб олинган Бони ҳозирча ўзини оқлаганича йўқ. Асосан заҳирадан туриб майдонга тушиб келди. Вильфрид Бони клубдаги ҳужумчиларнинг жароҳат олишгани боис, мажбурий тарзда сотиб олинди. “Суонси” билан келишувга кўра, футболчи “шаҳарликлар” сафида яхши ўйнаб кетадиган бўлса, бонус сифатида 3 миллион фунт стерлинг беришлари керак. Шунда ивуарлик ҳужумчи “Манчестер Сити”га салкам 28 миллион фунтга тушади. Бироқ “оққушлар” собиқ ўйинчисини яхши ўйнаб кетишларини бироз кутишларига тўғри келади. Агуэро ажойиб ўйнамоқда. Бони эса ўз вақтини кутишига озроқ борга ўхшаб қолмоқда.
 
Эдин Ж еко (Босния)

Трансфер нархи: 27 миллион фунт.
Қачон сотиб олинган: 2011 йилнинг қишида.
 
Жеко ҳам кетиш арафасида турибди. Футболчи 2011 йилда жамоага олиб келинганди. Бу вақт давомида Жеко яхши ва ёмон кунларни ўтказди. Жароҳатлар, голсиз ўйинлар барчаси унинг бошидан ўтди. Лекин мураббийлар ишониб келишаётганди. Ниҳоят, футболчи ва “Манчестер Сити”нинг муносабатлари узиладиган кўринади. Шунга қарамай, у клуб томонидан сарфланган маблағларни оқлаган. Клубга келган вақтида Жеко футболкалари сотувидан ҳам жамоа раҳбарияти анча даромад кўрганди. Шунингдек, жамоани Англия чемпиони бўлиши учун икки маротаба ҳисса қўшди. “Милан” жамоаси ҳужумчига асосий талабгор бўлмоқда. Инглизлар унинг трансферидан бироз даромад кўришлари ҳам мумкин.
 
Робиньо (Бразилия)

Трансфер нархи: 32,5 миллион фунт.
Қачон сотиб олинган: 2008 йилнинг ёзида.
 
Робиньо ҳам қанчалик техникаси кучли ва иқтидори бўлмасин, “Манчестер Сити”да ўзини тўлиқ кўрсата олмаган. Бунга футболчининг жароҳати ҳам таъсир қилган. 2008 йилнинг ёзида “Реал”дан 32,5 миллион фунт стерлингга сотиб олинган Робиньо биринчи мавсумида 14 маротаба рақиблари дарвозасини ишғол қилди. Кейинчалик эса омадсизликлар футболчини таъқиб қила бошлади ва аввалги даражасига чиқа олмай қолиб кетди. Кейинчалик эса “Милан” уни 15 миллион еврога сотиб олди. Кўриб турганингиздек, “Сити” унинг трансферидан фойдадан кўра, зарарга кўпроқ ишлади.
 
Серхио Агуэро (Аргентина)

Трансфер нархи: 38 миллион фунт.
Қачон сотиб олинган: 2011 йилнинг ёзида.
 
Ҳозиргача “Манчестер Сити” клуби томонидан сотиб олинган ҳужумчилар орасида сўзсиз Агуэро ўзига нисбатан ишлатилган пулларни оқлаган дейиш мумкин. Боз устига керагидан ортиқ маблағларни қайтара олган. Аргентиналик ҳужумчи тўрт мавсум ичида 100дан ортиқ голларни киритди. Клубга икки маротаба чемпионлик тожини олиб берди. Ҳар йили ёрқин даражада футбол намойиш қилиб келаётган кам сонли футболчилардан бири бўлиб турибди. Ҳозирда унга қатор клублар қизиқишмоқда. “Сити” Агуэрони сотадиган бўлса, катта даромад олиши мумкин. Бироқ шахйлар Бенземани сотиб олиб, икки футболчи ҳужумда ўйнатишни мақсад қилишган. Кўрамиз, бу мақсад амалга ошадимикан?
 
Карлос Тевес (Аргентина)

Трансфер нархи: 47 миллион фунт.
Қачон сотиб олинган: 2009йилнинг ёзида.
 
Тевес шу пайтгача “Сити” тарафидан энг қимматга сотиб олинган ҳужумчи ҳисобланади. Клубга келган йиллари Тевес ажойиб ўйинлар кўрсатган. Кўплаб голларни киритиб, жамоа ёқимтойига айланган. Кейинчалик эса бош мураббий Роберто Манчини билан ўзаро келишмовчиликлар, руҳсатсиз юртига кетиш қолиш сингари одатларни чиқарган. Тевес “Ювентус”га ўтгунига қадар Англия жамоасида 148та учрашувда 73 та гол урди. Бир қарашда яхши кўрсаткич эмас. Агуэро қайд этган натижа олдида бу иккинчи даражага айланади.
 
Иззатбек Абдуваҳобов тайёрлади