Малайзияда нуфуз жиҳатдан иккинчи ўринда дея эътироф этиладиган премьер лига иштирокчиси “Т-Тим” сафида ҳамюртларимиз Фарҳод Тожиев ва Садриддин Абдуллаевлар тўп суришини биласиз.

Бугун Малайзия премьер лигасида 16-тур учрашувларига старт берилди. Бир неча дақиқа олдин “Жоҳор Дарул Таъзим 2” – “Т-Тим” қарама-қаршилиги ниҳоясига етди. Беллашувда ҳамюртларимизнинг жамоаси йирик 4:1 ҳисобида имкониятни бой бериб қўйди.

Садриддин Абдуллаев ўйинни асосий таркибда бошлади ва 67 дақиқа ўйнади. Жароҳатини даволаш билан банд бўлган Фарҳод Тожиев эса майдонга тушмади. 

Шу ўринда таъкидлашимиз жоизки, Фарҳод “Т-Тим”нинг асосий ҳужум қуроли эди ва ҳамюртимизнинг жароҳат олиши мазкур клуб олдинги чизиғида жиддий муаммони вужудга келтирди. Шу боисдан жамоа Фарҳод Тожиевнинг ўрнини билинтирмаслик учун хорватиялик Томислав Бушични сотиб олди. Бушич бугунги баҳсда дебют қилди ва жамоасининг ягона голига муаллифлик қилди. Бу кетишда Фарҳод Тожиев тезроқ тузалиб сафга қайтмаса бўлмайдиган кўринади…