Тез орада Европада 2015/16 йилги мавсум старт олади. Биз ўтган мавсум якунлари ҳақидаги қизиқарли материалларни сизнинг эътиборингига ҳавола этишда давом этамиз. Бу сафар 2014/15 йилги мавсумда Кучли бешлик чемпионатларида энг кўп томошабин ташриф буюрган 10 та стадион ҳақида билиб олишингиз мумкин.

10. “Штутгарт”
Стадион: “Мерседес-Бенз Арена”
Сиғими: 60,449
Ўртача ташриф: 50,801
“Штутгарт” ўтган мавсумда Бундеслигада 18 та жамоа орасида 14-ўринни қўлга киритди. Шунга қарамай ушбу жамоанинг ҳар битта ўйинига 50 мингдан ошиқ мухлислар ташриф буюрди. Бу натижа Бундеслигадаги 5-кўрсаткич эканлигини ҳам таъкидлаб ўтиш жоиз.

9. “Марсель”
Стадион: “Стад Велодрам”
Сиғими: 67,394
Ўртача ташриф: 52,917
Франция чемпионатида тўртинчи ўринни эгаллаган “Марсель” мухлислар ташрифи бўйича ўз чемпионатида етакчи бўлди. Мавсум давомида “Велодрам”га ҳар ўйинда ўртача 52 мингдан ортиқ мухлислар келиб жамоани қўллаб қувватлаб туришган.

8. “Гамбург”
Стадион: “Имтеч Арена”
Сиғими: 57,000
Ўртача ташриф: 53,252
“Гамбург” Бундеслигада 16-ўринни банд этди. Бироқ бу клуб мухлислари ўз суюкли жамоаларини қўллаб қувватлашдан асло тўхташмади. “Имтеч Арена” ўйинларнинг 94 %ида мухлислар билан гавжум бўлди. Мана буни ҳақиқий садоқат десак муболаға деган сўз учун ўрин қолмас эди.

7. “Арсенал”
Стадион: “Эмиратес”
Сиғими: 60,432
Ўртача ташриф: 59,992
Лондонда жойлашган “Эмиратес” стадиони Премьер лиганинг 19 та ўйинида 99 % тўлди. “Арсенал”нинг ҳар бир ўйинида мухлислар жамоанинг ҳақиқий 12-ўйинчисига айлана олишди. Шуни алоҳида таъкидлаш жоизки, ўтган мавсумда “тўпчилар” анча мазмунли ўйин намоийиш этишди.

6. “Шальке 04”
Стадион: “Велтинс Арена”
Сиғими: 61,973
Ўртача ташриф: 61,578
Гелзеркинхендаги “Велтинс Арена” сатдионида ўтган мавсумда бирорта ҳам бўш ўрин қолиб кетмади ҳисоб. Фоиз ҳисобида оладиган бўлсак 99,36 ни ташкил қилади. Афсуски “Шальке” садоқатли мухлислари ишончини оқлай олмади ва чемпионатни 6-ўрин билан тугатди.


5. “Бавария”
Стадион: “Алянц Арена”
Сиғими: 75,000
Ўртача ташриф: 72,882
Мюнхенликлар Германияда қаторасига 3 мавсумдан буён чемпионликни бегона қилишмаяпти. Бироқ улар мухлислар борасида Европа уёқда турсин, ўз чемпионатларида ҳам биринчи бўла олишмайди. Бу ҳақда бироздан сўнг тўхталиб ўтамиз. “Алянц Арена” мавсум давомида 97 % тўлди.

4. “Реал Мадрид”
Стадион: “Сантяго Бернабеу”
Сиғими: 85,454
Ўртача ташриф: 73,081
“Қироллик клуби” ўтган мавсумни бир текис ўтказа олмади. Шу боис ҳам мухлислар ташрифи ҳар ўйинда ўзгариб турди. “Реал”нинг ҳар битта ўйинига ўртача 73 мингдан ортиқ мухлис келган бўлса ҳам, бу унчалик юқори натижа эмас. Зеро “Сантяго Бернабеу” ўз бағрига 85 мингдан ортиқ томошабинни сиғдира олади.

3. “Манчестер Юнайтед”
Стадион: “Олд Траффорд”
Сиғими: 75,635
Ўртача ташриф: 75,335
“Орзулар театри”да бўш ўринларга деярли кўзингиз тушмайди. “Қизил иблислар” мухлислари жамоалари мағлубиятга учраётган паллада ҳам суюклиларини ёлғизлатиб қўйишмайди. Ван Гал шогирдлари ўтган мавсумда 4-ўринни эгллашди, бироқ жамоа мухлислари Премьер лига чемпиони бўлишди!

2. “Барселона”
Стадион: “Камп Ноу”
Сиғими: 99,354
Ўртача ташриф: 77,632
Деярли 100 минг мухлис учун аталган “Камп Ноу” ўтган мавсумда ўртача 78 % гина тўлди холос. Энрике шогирдлари “требл” қайд этишган бўлсалар ҳам томошабинлар стадионни тўлдира олишмади. Шунга қарамай “Камп Ноу” Ла Лигада энг кўп мухлислар ташрифи қайд этилган стадион бўлди.

1. “Боруссия” Дортмунд
Стадион: “Сигнал идуна Парк”
Сиғими: 81,264
Ўртача ташриф: 80,463
Бу жамоа ўтган мавсумда ҳаттоки энг сўнгги поғонагача тушиб кетти. Лекин шунда ҳам клуб мухлислари ўз садоқатларини намойиш этиб, жамоаларини қўллаб қувватлашдан чарчашмади. “Боруссия” якунда еттинчи ўринни қўлга киритди. Бунда албатта мухлсиларнинг ҳам хиссаси бор. Ахир клубнинг ҳар бир уй ўйинда ушбу жамоани 80 мингдан ошиқ мухлислар қўллаб қувватлаб туришдида.

Юсупов Фурқат
Манба: www.Furkat.uz