Инглиз диёрида ўтадиган футбол матчлари ҳақиқий байрам шоусига айланиб кетиши, барчамизга маълум. Ўша фаворитлар ҳам аутсайдерга имкониятни бой бериб қўйиши ҳеч гап эмас АПЛнинг янги мавсуми старт олишига бор-йўғи 2 кун қолди! Шуни инобатга олиб, жорий мавсумда инглиз Премьер-лигасида иштирок этиш ҳуқуқини қўлга киритган 3 та “янги” дебютант жамоа ҳақида маълумот бермоқчимиз.
Биласиз, Чемпионшипнинг ўтган мавсум якунларига кўра “Норвич”, “Уотфорд” ҳамда “Борнмут” клублари Премьер-лигада иштирок этиш имконини қўлга киритишган. Биз мана шу 3 “бахтли” клуб ҳақида қисқача маълумот бериб ўтамиз.
НОРВИЧ
Қисқа ташриф қоғози
Ташкил этилган йили: 1902.
Шаҳар: Нориж.
Стадион: "Кэрроу Роуд" (27224 томошабин).
Жамоа лақаби: "Канарейкалар".
Бош мураббийи: Алекс Нил.
Ўтган мавсумда: Чемпионшипда 3-ўрин, плей-офф ғолиби
“Норвич” сўнгги икки мавсумни жуда “ғаройиб” тарзда ўтказди. Бундай дейишимизга сабаб шундан иборатки, “канарейкалар” жамоа 2013/14 мавсумни Премьер-лигада ўтказишганди. Аммо ўша мавсум жамоа жуда ёмон ўйин кўрсатиб, элитадан пастга “шўнғиганди”. Буни қарангки, “Норвич” жамоаси раҳбарияти-ю футболчилари ушбу “пастлаш”дан тезда тўғри хулоса чиқаришди ва дастлабки мавсумдан кейиноқ АПЛга қайтиб чиқишни уддалашди.
Тўғри, “Норвич” Премьер-лигага осонликча йўл олмади. Жамоа Чемпионшипда 3-ўринни банд этди ва плей-оффда иштирок этишига тўғри келди. Плей-офф финалида эса жамоа “Уэмбли”да “ Мидлсбро ”га қарши баҳс юритиб, икки тўп фарқи билан зафар қучди ва яна элитага қайтиб чиқди. Бунда, айниқса, жамоа устози Алекс Нил нинг меҳнати бор экани диққатга сазовор. Ушбу ёш мутахассис ярим мавсумдан беригина бу жамоани бошқармоқда. Аммо унинг бошчилигида жамоа деярли мағлубиятга учрамаяпти. Эндигина 34 ёшни қарши олган Нилдан Норижлик мухлислар Премьер-лигада кўп нарса кутишмоқда. Кўрамиз, у бу ишончни оқлай олармикан…
УОТФОРД
Қисқа ташриф қоғози
Ташкил этилган йили: 1881.
Шаҳар: Уотфорд.
Стадион: "Викаридж Роуд" (21400 томошабин).
Жамоа лақалари: "Сариқ армия", "Олтинранг йигитчалар".
Бош мураббийи: Кике Санчес Флорес.
Ўтган мавсумда: Чемпионшипда 2-ўрин.
“Уотфорд” учун келаётган мавсум узоқ кутилганларидан бири. Зеро жамоа 2006/07 мавсум якунида АПЛни тарк этганди ва мана узоқ йиллик танаффусдан сўнг "Сариқ армия" яна элитага қайтди. Қайтганда ҳам катта ниятлар-у, юксак мақсадлар билан!
Жамоа Премьер-лигага йўлланмани қўлга киритгач, биринчи навбатда бош мураббийни ўзгартирди. Славиша Йоканович ўрнига кимсан Кике Санчес Флорес олиб келинди. Илгари “Хетафе”, “Валенсия”, “Бенфика”, “Атлетико”, “Ал Аҳли” ва “Ал Айн” каби жамоалардаги фаолияти билан футбол жамоатчилигига танилган Флорес энди “Уотфорд”да “жонбозлик кўрсатиши”га тўғри келади. Ёш ва шижоатга тўла ушбу мураббий аллақачон “енг шимариб” ишни бошлаб юборган. У бир нечта кўзга кўринадиган харидларни ҳам амалга оширди. Буни “Уотфорд” ёзги трансферлар пайтида 20 миллион фунт ишлатгани ҳам кўрсатиб турибди. Демак, бу жамоадан “нимадир” кутсак бўлади. Шундай эмасми?!
БОРНМУТ
Қисқа ташриф қоғози
Ташкил этилган йили: 1890.
Шаҳар: Борнмут.
Стадион: "Дин Корт" (11700 томошабин).
Жамоа лақаби: "Олчаранглилар".
Бош мураббийи: Эдди Хоу.
Ўтган мавсумда: Чемпионшипда 1-ўрин.
“Борнмут” учун тарихий дамлар бошланмоқда! Жамоа ўз тарихида илк бор Англия Премьер-лигасида иштирок этади. Жорий мавсумда 125 ёшни қарши оладиган жамоа ишқибозлари учун бундан ҳам ортиқ “совға” борми?!
Ўтган мавсумда “Борнмут” чиндан ажойиб ўйин намойиш этди ва Чемпионшипда биринчи ўринни эгаллаган ҳолда хақли равишда элитага йўлланмага эга бўлди. Шу ўринда бир жиҳатга эътиборингизни тортсак: “Борнмут” АПЛга йўл олиш учун узоқ ва машаққатли йўл босиб ўтган. Жамоа Англиянинг қуйидаги деярли барча лигаларида иштирок этди ва 2008 йил жамоа бош мураббийига айланган Эдди Хоу бошчилигида Премьер-лигага чиқиш вазифасини уддалади. Мана 7 йилдирки, Хоу “Борнмут”га устозлик қилиб келмоқда ва айнан ушбу мураббийнинг “Борнмут” муваффақиятларида хиссаси улкан. Буни жамоанинг барча мухлислари жуда яхши билишади. Улар бу мураббий ва унинг шогирдларидан элитада ҳам яхши иштирокни кутишмоқда.
Хўш, улар Премьер-лигада ҳам ўзларининг энг яхши томонларини намойиш эта олишармикан… Бунисини энди янги бошланажак мавсум кўрсатиб беради…
