Польшалик ҳужумчи Роберт Левандовски «Барселона»дан кетишини расман маълум қилди.

37 ёшли футболчи Каталония клубида тўрт мавсум ҳаракат қилди. Шу вақт давомида у 191 та учрашувда майдонга тушиб, 119 та гол урди.

Левандовски «Барселона» билан бирга:

— 3 марта Испания чемпиони,
— Испания Кубоги соҳиби,
— 3 карра Испания Суперкубоги ғолиби бўлди.

Футболчи ўз қарори ҳақида ижтимоий тармоқлар орқали маълум қилди.

“Синовлар ва оғир меҳнатга тўла тўрт йилдан кейин олдинга ҳаракат қилиш вақти келди. Мен ўз вазифамни бажардим деган ҳис билан кетяпман.

Мухлислардан илк кунларданоқ олган меҳримни ҳеч қачон унутмайман. Каталония — менинг ердаги уйим. Бу ажойиб тўрт йил давомида учратган барча инсонларга раҳмат”, — деб ёзди Левандовски.

Шунингдек, ҳужумчи клуб президенти Жоан Лапортага ҳам алоҳида миннатдорлик билдириб, унга «Барселона»нинг бир қисми бўлиш имкониятини бергани учун ташаккур айтди.