Бугун “Меҳнатчи” стадионида ёш “насаф”чилар олмалиқлик тенгқурларига қарши Ёшлар лигаси 17-тури доирасида майдонга чиқишади.
16-турдан кейин икки жамоа Ёшлар лигаси турнир жадвалида ёнма-ён жойлашиган эди. Кеча “Қизилқум” ёшлари сафарда “Бунёдкор” устидан ғалабага эришиб, бешинчи поғонага кўтарилиб олишди.
Аъзам Шерғозиев мураббийлигидаги “Олмалиқ” ёшлари 16-турдан сўнг 28 очко тўплаган ҳолда турнир жадвалининг 4-поғонасида бораётган бўлса, Раҳматилла Муҳаммедраҳимов бошчилигидаги ёшлар жамоамиз эса 25 очко билан жадвалнинг 6-поғонасини банд этишган.
Мазкур жамоаларнинг 1-даврада “Олмалиқ”да ўтказилган баҳсида томонлар муроса йўлини танлашган – 1:1.
Ушбу учрашувда “Насаф” ёшлари таркибида бир қатор йўқотишлар мавжуд. Ўзбекистон ёшлар терма жамоасидан чақирув олган уч нафар футболчимиз – Азиз Ғаниев, Бобур Абдуҳолиқов ва Шароф Муҳиддинов мазкур ўйинда жамоасига ёрдам бера олишмайди.
Эслатиб ўтамиз, “Олмалиқ”- “Насаф” ёшлар жамоалари ўйини бугун 7 августь куни соат 18:00 да “Меҳнатчи” (аввалги “Спутник”) стадионида бошланади.
