Олий лиганинг 17-туридан ўрин олган "Пахтакор" - "Қўқон-1912" (4:1) учрашуви якунланганидан сўнг ташкил этилган матбуот анжуманининг биринчи қисмида меҳмонлар бош мураббийи Рустам Абдуллаев иштирок этди.
"Ютқазиш ҳар доим аламли. Мухлисларимиздан узр сўрайман. Бугун яхши ўйин кўрсата олмадик. Бизда гол уриш учун имкониятлар бўлганди. Бироқ гол ура олмадик. Агарда ўша вазиятдан унумли фойдаланганимизда ўйин бошқача кечиши мумкин эди. "Пахтакор" маҳорат бобида анча тажрибали ва биздан кучли. Ҳар ҳолда "Пахтакор" бекорга пешқадам жамоа саналмайди. Аввалги ўйинларда Носир Отақўзиев голлар уриб келаётганди. Бугун эса унинг омади келмади. Жамоамиз биринчи йил йиғилган. Жамоавий ўйинни ўйиндан-ўйинга шакллантириб бормоқдамиз. Футболчиларда психологик жиҳатдан ғолиблик руҳи етишмади. Бу нарса аста-секин шаклланиб боради", - дея ўйин ҳақидаги фикрлари билан ўртоқлашди Рустам Абдуллаев.
