Бугун озарбайжон футболи тарихидаги энг мудхиш воқеалардан бири рўй берди.
ANN TV журналисти Расим Алиев фэйсбукдаги саҳифаси орқали “Габала” футболчиси Жовид Хусайновни танқид қилганидан сўнг ўзини футболчининг яқинлари сифатида таништирган кимсалар томонидан дўпосланиб шифохонага ётқизилганди. Бугун, 9 август куни журналист танасидаги жиддий жароҳатлар оқибатида шифохонада жон таслим қилди. Бу ҳақида eurosport.ru сайти хабар бермоқда.
“Менинг исмим ушбу ҳодисага аралашиб қолганидан афсусдаман. Журналист Расим Алиев кипрлик журналистга нисбатан ишлатган имо-ишорам туфайли мени "тарбиясиз" деб атади. Мен Расим Алиевга қўнғироқ қилиб, у мени нотўғри тушунганини, ўша ҳатти-ҳаракат аслида дўстона муносабатни англатишини ётиғи билан тушунтирдим. Суҳбат давомида агар мен ва оилам ҳақида билишни хоҳласа, уйимга келиб қўни-қўшнилардан суриштириши мумкинлигини айтдим. У мени тўғри тушунди. Журналист ўртада тушунмовчилик юз берганини айтиб, фэйсбук орқали мендан узр сўради. Кейин биз у билан хайрлашдик. Кейин нима бўлгани - менга қоронғу. Биз ҳозир нима бўлганини аниқлашга уриняпмиз. Умид қиламанки, эртагаёқ ҳаммаси ойдинлашади”, - дея 1news.az интернет-нашри футболчининг сўзларини келтиради.
Расим Алиев сўнгги 10 йил ичида зўравонлик натижасида ҳаётдан кўз юмган Озарбайжондаги учинчи журналистга айланди.
