Қозоғистон ўсмирлар терма жамоаси ўртоқлик учрашуви таклифи билан “Бунёдкор” ФКга мурожаат этди.

Айни пайтда ўсмирлар ўртасидаги Европа чемпионати саралаш мусобақасига тайёргарлик кўраётган Қозоғистон U-17 терма жамоаси тайёргарлик босқичи доирасида “Бунёдкор” футбол мактабининг 1999 йилда таваллуд топган тарбияланувчилари билан куч синашмоқчи эканликларини билдиришган. Ушбу мурожаатни “Бунёдкор” ФК қабул қилиб, ўртоқлик учрашувини тасдиқлади.
Шу тариқа, томонлар “Бунёдкор-99” ва Қозоғистон U-17 терма жамоаси ўртасидаги халқаро ўртоқлик учрашувини 13 август куни Чимкент шаҳрида ўтказишга келишиб олинди.

Маълумот ўрнида, қозоғистонликларнинг ушбу ёшдаги терма жамоасига испаниялик мутахассис Карлес Марторелл мураббийлик қилмоқда.

Қайд этиш керакки, Қозоғистон футбол федерациясининг ушбу мурожаати "Бунёдкор" футбол мактабининг самарали меҳнатига берилган юқори баҳодир.