УЕФА раҳбари Мишель Платини ФИФА президентлигига 29 май куни Цюрихда ўтказилган сайловлар арафасида Йозеф Блаттернинг 80 ёшли акаси Петерга босим ўтказган. Бу ҳақда 79 ёшли Блаттер Голландиянинг de Volkskrant нашрига берган интервьюсида маълум қилди. “Платини акамга шундай дебди:

Йозефга айт, у сайловгача истеъфо бериши керак, ёки қамоққа ўтиради”, – унинг сўзларини келтиради нашр. Платинининг яқинларидан бири ушбу ахборотни инкор қилди. “Бу дунёни ФИФАнинг асл муаммоларидан чалғитишга қаратилган навбатдаги ёлғондир, – маълум қилди у. – УЕФА президенти бундай кулгули айбловларга жавоб бериб ўтирмайди. У ҳозирликда уни қўллаб-қувватлаётган миллий федерациялар билан ҳамкорликда ФИФАнинг имижи ва обрўини тиклайдиган дастурни тайёрлаш билан банд”.

ФИФА тарихидаги энг йирик коррупцион жанжал шу йилнинг 27 май куни бошланди. АҚШ судининг қарорига кўра ташкилотнинг амалдаги ва собиқ мансабдорлари сўроқ қилинди ёки ҳибсга олинди. Президент Блаттер, навбатдаги сайловларда ғалаба қозонган бўлишига қарамай, истеъфо беришга мажбур бўлди.