Фарғонанинг “Нефтчи” клуби ўтган тур Муборакда “Машъал”га қарши учрашувни ўтказди. Мазкур учрашув борасида бир қизиқ жиҳат эътиборимизни тортди. Бу ўйин қайдномасидан меҳмонларнинг ҳужумчиси Рўзимбой Аҳмедов ҳам ўрин олган эди ва захирада ўтирди. ПФЛ регламентига биноан тўрт марта огоҳлантириш олган футболчи кейинги баҳсни ўтказиб юборади. Айнан шу қоида бўйича тушунмовчилик келиб чиқди. Яъники Аҳмедов 19-турда “Навбаҳор” билан учрашувда ПФЛ маълумоти бўйича тўртинчи огоҳлантиришини олган эди.
Рўзимбой бунгача 3-турдан ўрин олган “Нефтчи” – “Металлург” баҳсининг 49-дақиқасида ҳакам томонидан биринчи марта огоҳлантирилди. Иккинчи огоҳлантиришини эса 5-турда “Нефтчи” – “Машъал” ўйинининг 18-дақиқасида олган эди. 12-тур доирасида бўлиб ўтган “Нефтчи” – “Олмалиқ” ўйинида ҳам Рўзимбой 41-дақиқада огоҳлантирилди. Ниҳоят 19-турга келиб Аҳмедов 89-дақиқада тўртинчи огоҳлантиришини олди. Бироқ, шунга қарамай, футболчи “Машъал”га қарши ўйинда захирада ўтирди ва қайдномага киритилди. ПФЛ расмий маълумоти асосида олинган маълумотларга таянадиган бўлсак, огоҳлантиришлар сони тўртта бўлган эди.

ПФЛ эълон қилган 20-турни ўтказиб юбориши керак бўлган футболчилар рўйҳатида ҳам бу футболчининг номи тилга олинмади. Ўйлаймизки, юзага келган тушунмовчилик бўйича ПФЛ  ёки “Нефтчи” футбол клуби ўз муносабатини билдиришади. Бу бўйича ПФЛ қарори қандай бўлишини кузатамиз.