Таиланд пойтахти Бангкок шаҳрида эркаклар ўртасида ўтказилаётган Осиё чемпионатида бешта вазн тоифасида ярим финалчилар номи маълум бўлди.
Эътиборлиси, ярим финалга етиб келган спортчилар сафидан Хасанбой Дўстматов (-49 кг), Муроджон Аҳмадалиев (-56 кг), Фазлиддин Ғоипназаров (-64 кг), Бектемир Мелиқўзиев (-75 кг) ва Рустам Тўлаганов (-91 кг) каби Ўзбекистон терма жамоаси аъзолари ҳам ўрин эгаллашди.
Чорак финалда баҳс юритган спортчиларимиз орасида 2014 йили Нанкин шаҳри (Хитой)да ўтказилган ўсмирлар олимпиада ўйинлари ғолиби Бектемир Мелиқўзиев амалдаги жаҳон чемпиони, Осиё ўйинлари ғолиби Жанибек Алимхан ули (Қозоғистон)ни мағлуб этгани ҳар қанча тахсинга лойиқ.
Юқорида номлари зикр этилган спортчиларимиз, шунингдек, Осиё чемпионатининг камида бронза медаллари ҳамда жорий йилнинг 5-8 октябрь кунлари Қатар пойтахти Доҳа шаҳрида ўтказиладиган жаҳон чемпионати йўлланмаларини нақд қилиб қўйдилар. Эслатиб ўтамиз, мазкур жаҳон чемпионатида 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг йўлланмалари ўйналади.
Бундан ташқари бугун яна тўрт нафар спортчимиз – булар Шахобиддин Зоиров (-52 кг), Элнур Абдураҳимов (-60 кг), Элшод Расулов (-81 кг) ҳамда Баҳодир Жалолов (+91 кг) чорак финал жангларида рингга кўтариладилар. Умид қиламизки, Рустам Саидов бошчилигидаги терма жамоамиз аъзолари навбатдаги жангларда ҳам зафарли одимлашда давом этиб, янада юқори натижаларга эришадилар. Бу йўлда уларга омад ва зафарлар тилаб қоламиз.
Шавкат Жалилов
