“Манчестер Юнайтед” ҳужумчиси Уэйн Руни Англия терма жамоаси таркибида Евро-2016 саралаши доирасидаги учрашувлардаги сермаҳсулликдан кейин АПЛнинг “Ливерпул”га қарши ўтадиган ўйини ҳақида фикрларини айтиб ўтди.

Эслатиб ўтамиз, форвард “Уч шерлар” таркибидаги 50-голини киритган ва инглизлар афсонаси Бобби Чарльтон рекордини янгилаганди.

“Жуда хурсандман ва мухлислардан мени қўллаб-увватлаганликлари учун миннатдорман, лекин энди Манчестерга қайтаман ва клуб билан “Ливерпул”га қарши ўтадиган учрашувга тайёргарлик кўраман.

Терма жамоа таркибида кетма-кет ўтказган иккита ўйинда 2 та гол киритганимдан кейин “МЮ” сафида ҳам муваффақиятли юришни давом эттиришимга умид қиламан.

Охирги мағлубиятдан (“Суонси” – 1:2) кейин “Ливерпул”га қарши уйда ўтадиган учрашувда ғалаба қозонишимиз яхши натижа бўлади.

Мерсисайд клуби билан ўтадиган ўйинни интиқ бўлиб кутаяпман”, – дея Руни сўзларини келтиради Sky Sports га таяниб Sports.ru.

Эслатиб ўтамиз, “МЮ” – “Ливерпуль” учрашуви шанба куни Тошкент вақти билан 21.30 да бошланади.