«Олдингдан оққан сувнинг қадри йўқ» - бу мақол бежиз айтилмаган. Башарият ҳеч қачон муайян нарсалар қадрига етмайди. Бу каби ҳолатни футболимизда ҳам кўриш мумкин. Шахсан мен Рауф Инилеевнинг ҳамон ишсиз юрганидан таажжубдаман. Наҳотки, Рауф Талгатович бирор терма жамоамиз ёки клубни бошқаришга лойиқ бўлмаса? Ахир гап кўпни кўрган, етарли тажрибага эга мутахассис ҳақида кетяпти. Айни пайт миллий жамоамиз шарафини ҳимоя қилаётган кўплаб футболчиларимиз Инилеевдан сабоқ олишган, унинг қўл остида тўп суришган.
Дейлик, Одил Аҳмедов, Виталий Денисов, Сервер Жепаров, Азиз Ҳайдаров, Ислом Тўхтахўжаев, Александр Гейнрих... Умуман олганда , Рауф Талгатович нафақат ёшлар термаси, балки миллий жамоамизни ҳам бинойидек бошқарган эди. Қолаверса, у тузган жамоа Дохада ўтган Осиё ўйинларида чакки таассурот қолдирмаганди. Энди шундай мураббий нега ишсиз юрибди? Нима, унинг вақти ўтганми? Йўқ, менимча, Рауф Талгатовичнинг қўлидан ҳали кўп иш келади. Ахир тажриба ўз-ўзидан йўқолиб қолмайди-ку. Муҳими, Инилеев ҳужумкор футбол тарафдори ҳисобланади. Хитой Тайпейи 9:0, Сингапур 7:3 ҳисобида доғда қолдирилганини бир эсланг. Унинг фаолиятида бундай ёрқин ўйинлар жуда кўп. Бас шундай экан, лоақал бирор клубимиз Инилеевни таклиф этса, менимча, зарар қилмайди. Ҳарқалай, шундай тажрибали мутахассиснинг бўш юриши анча ғалати...
Камол Ботиров, Тошкент шаҳри.
