Олий лигада чемпионлик учун курашаётган “Локомотив” бугун мавсумнинг муҳим баҳсларидан бирини ўтказади. “Темирйўлчилар” сафарда “Пахтакор”га қарши тўп тепишади.

Айни пайтда олий лига турнир жадвалида “Пахтакор” биринчи, “Локомотив” иккинчи ўринда бормоқда ва бу жамоаларни икки очко ажратиб турибди. Агар “Локомотив” мазкур баҳсда ғалаба қозонгудек бўлса, турнир жадвалида биринчи ўринга кўтарилиб олади.

Жамоамиз бугунги беллашувга жиддий ҳозирлик кўрди. Ҳужумчимиз Марат Бикмаев айтганидек, ҳар кунги машғулотлар қийин кечди ва тайёргарлик шунга яраша олиб борилди. Энди эса ўйинда майдонга тушиб ғалаба қозониш қоляпти.

Бугунги учрашувни мамлакатимизнинг энг кучли ҳакамларидан бири Равшан Эрматов бошқариб боради. Эслатиб ўтамиз, биринчи даврадаги “Локомотив” стадионида кечган баҳсни ҳам айнан шу ҳакам бошқарган ва бунда “Локомотив” 2:1 ҳисобида ғалаба қозонган. Биз бугунги ўйинда ҳам Вадим Абрамов шогирдларидан фақат ва фақат ғалаба кутиб қоламиз. Шунда турнир жадвалида яна биринчи ўринга кўтарилиб оламиз.

Эслатиб ўтамиз, бугунги баҳс “Пахтакор” марказий стадионида бўлиб ўтади ва ўйин 17:30да бошланади.