16 сентябрь куни мамлакат кубоги ярим финали жавоб учрашувлари доирасидаги “Бунёдкор” – “Пахтакор” учрашуви бўлиб ўтади.

Бунгача кубок доирасида Тошкентнинг икки гранд клуби бир-бирлари билан олти маротаба рўбарў келишган. Ўзаро ўйинларда “Бунёдкор” ҳисобида учта ғалаба бор “Пахтакор” эса иккита ўйинда ғолиб чиққан. Битта баҳсда кучлар тенг келган. Тўплар фарқи – 10:6, “қалдирғочлар” фойдасига.

“Бунёдкор” ва “Пахтакор” жамоалари кубок доирасида биринчи бор 2007 йили финалда куч синашишган. Ўзбек футболи тарихида “лой жанги” номи билан эсда қолган ушбу баҳсда пенальтилар сериясида “пахтакорчилар” ғалаба қозонишганди. Орадан бир йил ўтиб, “Пахтакор” ва “Бунёдкор” яна кубок финалида учрашишди. Бу сафар “қалдирғочлар” 3:1 ҳисобида ғолиб чиқишди. 2009 йилда ҳам ҳал қилувчи финал бу икки жамоа ўртаси ўтди. Кетма-кет учинчи финалда “шерлар” 1:0 ҳисобида устун келишди. Шундан кейин 2012 йилги кубок баҳсларининг ярим финали яна принцпиал рақибларни учраштирди. “Жар”даги баҳсда 1:1 ҳисоби қайд этилган бўлса, “Пахтакор” майдонида кечган жавоб учрашувида “Бунёдкор” ғалаба қозона олди – 3:1. Жорий йилги мамлакат кубоги ярим финалида ҳам мухлислар “қалдирғочлар ва “шерлар” қарама-қаршилигига гувоҳ бўлишмоқда. “Пахтакор” стадионида ўтган биринчи ўйинда Сергей Лушчан шогирдлари 3:2 ҳисобида ғолиб чиқишди.

“Бунёдкор” мезбонлигидаги ўтадиган жавоб баҳси 16 сентябрь, чоршанба куни “Бунёдкор” стадионида соат 18:00да бошланади. Учрашувни Виктор Серазетдинов бошчилигидаги пойтахтлик ҳакамлар гуруҳи бошқариб боришади.

Учрашувни “Пахтакор” ҳимоячиси Даврон Хошимов дисквалификация туфайли ўтказиб юборади.

Қуйидаги ҳаволаларда “Бунёдкор” ва “Пахтакор” жамоаларининг кубок доирасидаги ўзаро ўйинларида киритилган голларни томоша қилишингиз мумкин