WBA (Regular) йўналишида жаҳон чемпиони бўлмиш ўзбекистонлик Руслан Чагаев Россия фуқаролигини олиш ниятида эмас. У бу ҳақда ТАСС нашрига маълум қилган.

2014 йилнинг 6 июль кунида Грозний шаҳрида Чагаев Френсис Окендога қарши жанг учун рингга Россия байроғи билан чиққан ва унинг ўша жангги учун Россиянинг "Терек бокс инвест" компанияси ҳомийлик қилганди.

Шу туфайли россиялик журналистлар унга ўз тахминлари билан мурожаат қилишган.

"Айни вақтда менда бундай истак йўқ. Мен Ўзбекистон фуқаросиман. Шу билан биргаликда мен миллатчи ҳам эмасман, дунёнинг кўплаб давлатларида дўстларим ва яқин кишиларим бор. Мен ҳозир Россияда истиқомат қилиб турибман, лекин менда Ўзбекистон паспорти бор ва бу паспорт билан Россияда ҳеч қандай муаммосиз яшашим мумкин", дейди у журналистларнинг шу хусусдаги саволига жавобан.

Маълумот учун, 36 ёшли ушбу спортчи ҳаваскорлар ўртасида 2 марта жаҳон чемпиони ва 2 марта Осиё чемпиони бўлган. У профессионал боксга кириб келганидан кейин 37та жанг ўтказган (31 ғалаба, шундан 21тасида нокаут билан, 2та мағлубият ва битта дуранг).

У шу йилнинг 11 июлида рингга чиқиб, италиялик Франческо Пьянетни биринчи раунддаёқ нокаутга учратганди.

Чагаевнинг кейинги жангги шу йилнинг 17 октябрь кунида Германиянинг Киле шаҳрида Окендога қарши реванш жанги сифатида ўтади.